NANNEDDU MEU

Nanneddu meu su mundu es' gai
a sicut erat no' torra mai.

Semus in tempos de tirannia,
infamidades e carestias;
como sos populos cascan che canes
gridende forte : " .... cherimus pane ".

Famidos nois semus pappande
pane e castanza, terra cun lande;
terra ch'at fangu, torra su poberu
senz'alimentu, senza ricoveru.

Cussas banderas numeru trinta
de binu bonu mudana tinta;
appenas mortas cussas banderas
no' pius s'osservan' inbriacheras.

Semus sididos in sa funtana
pretende s'abba parimos ranas;
abocaeddos, laureados
buzzacas boidas e ispiantados.

Adiosu Nanni, tenet'a contu
faghe su sardu, ghettad'a tontu
e tantu l'ides' su mundu es' gai
a sicut erat no' torrat mai.

Peppino Mereu