News

ARBITALIA.net
Shtëpia e Arbëreshëve të Italisë La Casa degli Albanesi d' Italia

index/home	kulturë/cultura	histori/storia	gjuhë/lingua	letërsi/letteratura	art/arte
hapje/apertura	komunitet/comunità	tradita/tradizioni	special/speciale	turizëm/turismo	shfaqje/spettacoli
redaksi/redazione	lajme/notizie	shtyp/stampa	motorë/motori	ligje/legislazione	lidhje/links


Le news di Engjell Koliqi

NË FIRENCË U MBAJT KUVENDI I DYTË I LIDHJES SHQIPTARE NË ITALI:

ME VEPRIMTARITË E PËRBASHKËTA SHQIPTARO-ARBËRESHE TË SHEMBULLOJMË BASHKIMIN E MIRËFILLT KOMBËTAR

	Në Kuvend ishte i pranishëm edhe kryetari i Lidhjes Shqiptare në Botë - Z. Simon Kuzhnini dhe i vëllai i tij binjak - Mikeli - veprimtar i dëshmuar në realizimin e shumë projekteve kombëtare.
	Pjesëmarrja e përfaqësuesve të shoqatave arbëreshe motivim për një bashkim të mirëfillt kombëtar.
	U zgjodh kryesia e re 23 anëtarëshe. Kryetar i kryesisë u zgjodh Xhafer Berisha, kurse nënkryetarë: Nehat Marku, Sokol Borshi, Mexhit Xhaferi e Vatë Marashi.
	Nga Italia në Kongresin e parë të Lidhjes Shqiptare në Botë do të shkojnë 150 delegatë.
	Pjesëmarrje në kuvend e patriotëve të ardhur nga Gjeneva e nga Brukseli.
	Me recitime patriotike u shënua edhe përvjetori i shpalljes së Kushtetutës së Parë të Republikës së Kosovës (Kushtetutës së Kaçanikut).
	Kah fundi i tetorit mbahet një manifestim kulturor shqiptaro-arbëresh, para Kolegjit të Shën Adrianit, në Shën Mitër Korone të Kalabrisë.

Romë, 10 shtator 2001 (QIKSH Albeuropa - ARBITALIA - BOTA SOT)

E diela e 9 shtatorit, në Firencë - në djepin e kulturës italiane, jehoi shqip. Në sallën e mbledhjeve, në objektin e Bibliotekës së Komunës së Firencës, në Sheshin Alberti - të stolisur me flamuj, ishin mbledhur qindëra shqiptarë e arbëreshë, për të marrë pjesë në Kuvendin e Dytë të Lidhjes Shqiptare në Itali e për të shënuar përvjetorin e shpalljes së Kushtetutës së Parë të Republikës së Kosovës (Kushtetutës së Kaçanikut), me të cilën u vunë themelet e Shtetit të Kosovës.

Kuvendin, në të cilin ishin të pranishëm 93 delegatë e shumë mysafirë, e shpalli të hapur kryetari i Shoqatës <<ALBANIA>>, Z. Vatë Marashi, i cili pasi përshëndeti mysafirët dhe kryetarin e Lidhjes Shqiptare në Botë - Z. Simon Kuzhnini-n, këtij të fundit ia dha fjalën. Z. Kuzhnini, pasi falënderoi të pranishmit për pjesëmarrje dhe për veprimtaritë e shumta e të frytshme të Mërgatës Shqiptare në Itali, foli për ecurinë e vështirë, por të sigurtë të krijimit dhe të marshuimit të Lidhjes Shqiptare në Botë (LSHB), që tashmë i ka lëshuar rrënjët anekënd botës, kudo që jeton e vepron fara arbërore. LSHB nuk është krijuar si një organizëm që nuk njeh e mohon organizmat tjera kombëtare - tha Z. Kuzhnini - por është krijuar si organizëm që don të lidhë të gjitha subjektet arbërore, duke afruar programet e projektet, duke i harmonizuar ato e duke zhvilluar veprimtaritë kombëtare, me një koordinim të gjithanshëm. Duke folur për organizimin e Kongresit të Parë të LSHB-së, Ai tha se nuk është zgjedhur rastësisht Prizreni. Në Kongresin e Parë të LSHB-së - tha kryetari Kuzhnini - Platforma Kombëtare do të shënojë bashkimin shpirtëror kombëtar, që do të kurorëzohet me bashkimin fizik - të të gjitha trojeve arbërore. Mendoj se me të drejtë njerëzit kanë filluar ta quajnë Lidhja e Tretë e Prizrenit, Kongresin e Parë të LSHB-së, ende para mbajtjes - ka përfunduar Z. Simon Kuzhnini.

Pastaj Kuvendi ka vazhduar nën udhëheqjen e nënkryetarëve: Xhafer Berisha e Nehat Marku e kryetarë dhe përfaqësues shoqatash kanë parashtruar vërejtje dhe sugjerime për Platformën Kombëtare që do të aprovohet në Kongresin e Parë të LSHB-së. Parimisht - Platforma Kombëtare dhe dokumentet tjera të Kongresit janë përkrahur nga delegatët e Kuvendit. Sidomos emocionuese kanë qenë diskutimet e delegatëve të shoqatave arbëreshe. Sekretari i Shoqatës "Skanderbeg" nga Porkanuni (Portocanone) e Molises - Z. Teodhor Muzaqi (Teodoro Musacchio) ka thënë se deshti fati që të takohemi në orën 12 pa pesë dhe me veprimtari të përbashkëta e të koordinuara të programeve kombëtare ta shpëtojmë Farën Arbërore, që në Itali, megjithë vështirësitë e shumta po qëndron krenare dhe e pamposhtur plot pesë shekuj e gjysmë, nga asimilimi. Disa nga delegatët e Kuvendit kanë kërkuar që në Platformën Kombëtare t'i kushtohet hapsirë dhe kujdes i posaçëm edukimit të rinisë shqiptare, që në kohët e fundit është rrezikuar tmerrshëm nga droga, prostitucioni dhe nga sëmundjet vdekjeprurëse që vijnë nga këto dukuri të zeza, si dhe këmbëngultësinë para organizmave dhe fuqive ndërkombëtare në trojet tona, që të mos i prekin traditat tona të shenjta kombëtare dhe thesaret natyrore e shpirtërore të tokave dhe të qenieve arbërore.

Me vota të hapta u zgjodh Kryesia e Re e Lidhjes Shqiptare në Itali, në këtë përbërje: Xhafer Berisha (kryetar), Nehat Marku (nënkryetar), Sokol Borshi (nënkryetar), Mexhit Xhaferi (nënkryetar e arkatar), Vatë Marashi (nënkryetar), Engjëll Koliqi (sekretar) dhe nëtarët - Kadri Ballazhi, Leon Mirakaj, Luis De Rosa, Nuhish Sallahi, Hajredin Kaza, Aziz Duraj, Asman Cakiqi, Agron Berisha, Nebi Cikaqi, Besim Jashari, Alfons Xhuveli, Ilir Qose, Avdi Beqiri, Pashk Ballabani, Skënder Klosi, Teodhor Muzaqi e Xhafer Tari. Patriotët e veprimtarët e shquar: Mustafë Previzi e Vitore Stefa-Leka janë shpallur anëtarë nderi të Kryesisë së LSHI dhe janë propozuar për delegatë të Kongresit.

U vendos që në Kongresin e Parë të LSHB-së, që do të mbahet më 26-28 Nëntor 2001 në Prizren, nga LSHI të shkojnë 150 delegatë, nga të cilët së paku 30 do të jenë arbëreshë. Brënda një muaji shoqatat do t'ia paraqesin Kryesisë listat me emrat e kandidatëve të propozuar për delegatë të kongresit të Parë të LSHB-së, që do të shpallen solemnisht në Manifestimin e Shën Mitrit.

Kulmi i emocioneve u mbërrijt, kur delegatët arbëreshë u shpallën anëtarë nderi të shumë shoqatave shqiptare e vëllezërit Kuzhnini, si dhe disa nga veprimtarët e shquar të Mërgatës së Re Shqiptare në Itali, u shpallën anëtarë nderi të disa shoqatave arbëreshe. Me këtë rast doli nisma për organizimin e manifestimeve të përbashkëta kulturore. Kah fundi i muajit të ardhëm (tetorit) do të fillojë seria e manifestimeve të përbashkëta, me manifestimin kulturor shqiptaro-arbëresh, para Kolegjit të Shën Adrianit, në Shën Mitër Korone të Kalabrisë - aty ku mbahet Festivali i Këngës Arbëreshe, aty ku janë shkolluar e formuar rilindasit arbëreshë Jeronim De Rada, Zef Serembe, Anton Santori... aty ku është shkolluar e formuar edhe patrioti Avni Rrustemi. Në Shën Mitër do të themelohet edhe Këshilli Koordinues i Shoqatave Shqiptare e Arbëreshe në Itali (KKSHSHAI), që do ta zëvendësojë Bashkimin e Shoqatave Shqiptare e Italo-Shqiptare në Itali (BSHSHISHI), që është kritikuar për neglizhencë dhe për mosbashkëpunim me shoqatat arbëreshe.

Kuvendin e Dytë të LSHI, me pjesëmarrjen e tyre e kanë nderuar edhe mysafirët: Prof. Astrit Leka - shkencëtar e veprimtar i dëshmuar, i ardhur nga Gjeneva dhe anëtarët e Kryesisë së Lidhjes Shqiptare në Beneluks - Ramiz Basha e Sedat Mehmeti, të ardhur nga Brukseli. Pjesëmarrësit kanë nënshkruar një peticion drejtuar Qeverisë së Sllovakisë për mbrojtjen e pikturës më të madhe në botë të portretit të Gjergj Kastriotit - Skënderbeut, qwë gjendet në Kështjellën e Bitça-s në Sllovaki dhe për vendosjen e bustit të Nënës Tereze në një nga sheshet e Bratisllavës, si dhe kërkesën për vendosjes së përmendores së Skënderbeut në një nga sheshet e Londrës - nisma këto të shkencëtasrit e veprimtarit 86 vjeçar - Astrit Leka.

Delegatët e Kuvendit të Dytë të LSHI, mysafirët dhe shumë pjesëmarrës nga shoqatat e Firencës - ALBANIA, KOSOVA dhe SHQIPONJA shënuan përvjetorin e shpalljes së Kushtetutës së Parë të Republikës së Kosovës, e njohur si Kushtetuta e Kaçanikut, që vuri themelet e Shtetit të Kosovës, me recitime patriotike të motrave Jashari të ardhura enkas nga Triesta dhe të poetes së njohur Vitore Stefa-Leka.

ENGJËLL KOLIQI