Sa nexi de tantis doloris est totu cosa mia. Fiast piticu candu
ant mortu a babu tuu e, de sa dì, sa vida nosta est unu
trumentu, scéti unu trumentu.
Sa vida in domu est cambiada de issaras.
Su disprexei, su prantu, e is notis abillendi, si funt postus
a meris de nosus.
Fradis tuus ant castiau su bestiamini, su pagu chi teneus, su
pagu chi teneus po podi bivi.
Is pentzamentus non m'ant lassau assebia mai mei dis e mei notis
longas, ispetendi su furriadroxu; e sa timoria est crescia dì
po dì.
Sa tirria, s'arrevesa, s'offesa fiant sempri po si binci. Su tempus
non passat mai. Tui ancora piciochedhu e deu bivendi cun s'assichidu
prontu e s'arregodu sempre ananti. Tui, s'urtimu nasciu in domu,
fusti su sprigu de su corrutu e su spetu po sighì a circai
sa dì noba. Cun su tempus mi seu sapìda ca crescendi
portasta in su coru s'arrabiu de su chi iaus patiu. Su disisperu,
sa malasorti e sa vida mia negada cumpariant in sa cara cosa tua.
Su non ai perdonau, su nominai su dannu e su nomini de su chi
iat sparau ant fatu de tei un omini chi at mortu.
Poita sa manu tua non s'est firmada? Poita dhas fatu chenza 'e
mi nai nudha? Poita s'odiu t'at bintu s'arraxoni? Deu innoi fui
in cussus momentus ?
Cussa spina in su coru mi nd'at pigau su sentidu. Fiast unu piciochedhu,
bellu, e capassu. Adella ti stimat de coru, ita no iat ai fatu
po tei, pentzat a una vida noba po totus e dusu.
Funt passaus dexi annus. Su monti t'at cuau ma t'at fintzas accorrau.
Paiscì chi t'at agiudai candu est cilixia, cun su bentu
fridu e su gellu de timiri. Cantu bortas t'as a essi pentzau,
t'as a essi biu po essi atri e invecias sempri solu, sempri timendi
sa morti in donnia muridina.
Sanzinendi che una atitadora fuedhu de cosas chi non podint essi
e sigu a approntai mingias de lana, a sa manera de candu tui fiast
piciochedhu....prenda mia, as a essi cancarau de su frius e depis
essi sempri prontu a ti fuiri, ma ita pentzas imoi, ita pentzas,
ita pentzas imoi....ma po mei ses sempiri bellu e bonu cumenti
ti bidia un tempus.
Nemus in bidha si dh'aspetàda; e totus mi pregòntant
" e Luisu?"
Non fuedhu, non bollu fuedhai. Ndi oint sciri de cosas, pagu dilicaus,
non pòrtant spina che a mimi in su coru, non s'impriutzint
a su nomini tuu, non cumprendint totu su chi ses po mei.
Candu pentzu a cumenti as a bivi, totu sa vida tua negada, mi
pigat sa gana de ti nai a tzerrius "furria a bidha, calandi
de su monti"! Ma apustis ti torru a biri prexau tochendi
su sonetu, badhendi e scracaliendi de s'arrisu, ti torru a biri
indrillendi is canis e s'ammachiu chi teniast po su bestiamini
e mi citu. Abarra cuau, abarra cuau chi non ti cassint, tanti
sa luna e su soli bessint po tei puru donnia dì. Mandiari
nd'agatas, e pillonis de cumpangia non dh'ammancat. Sa vida innantis
de oi, candu fiaus poberus, fiat aici e pariat totu bellu, issandus
fiaus prexaus prus de oi.
Aba t'arregordas, cun is erbas, fadiat su meigu mellus de is chi
oi si faint tzerriai dotori e sa domu fiat prena sempri de genti.
Impara su chi non iscis e cun su tempus sa terra t'at a fai de
mama, nudha t'at ammancai. Deu imoi seu becia e fadiada, non tengiu
spetu de un'atra vida e su lutu fintzas a sa morti m'at acumpangiai.
De tei non tengiu bregungia prusaprestu est sceti su dolori chi
as a depi afrontai chi non mi lassàt assebia.
Is carabinieris mi pregòntant sempiri "dove si trova
suo figlio? Lo faccia costituire", e sempiri mi scidrat su
sanguni a s'idea chi t'agatint.
Ierru e istadi àndant e tòrrant e tantis bortas
apu incarrebau in su mori de monti mannu po su disigiu de t'atobiai,
ma apu sempri furriau po sa timoria chi m'essint scocada. Mi schissiu
chi non ti biu ma non ap' a essi eu sa chi ti fait bessì
a su campu. Chi podis beni tui a su noti, beni apata apata, ghettadinci
unu sciallu e intra chenz' 'e ti furriai. Sa crai est cuada ancora
in su propriu logu, inguni anca dh' iast lassada. Deu ti ollu
impressai, ti ollu fuedhai ma s'uturu miu s'est sicau e feti po
sa lambriga de su prantu mi parit ca seu bia.
Domu nosta est sempiri uguallis, totu est abarrau cumenti fiat,
totu s'est firmau candu ci ses bessiu fuenditì a lestru.
Sa noti pixa nde calada e non at obresciu prus. Sa tenta de sa
vida ci dh'apu a iscudi in su scuru chenza 'e gosu e chenza 'e
arrisu. Sa cundanna dha fatzu deu a su postu tuu, cun coragiu
e cun amori. Dì po dì attitu cumenti is antigus,
ma fillu miu est ancora biu e ispetu.... ispetu chi torris.
Franca Cocci SESTU (CA)
