Cando
si esperimentan comente si cumportan sas cosas o sas personas, talunos
risurtados enin prevedios chena farta peruna, e ateros, a su contrariu, aspettados in mesu
a tantos. Si pesamus in aria una pedra sa previsione nostra est chi nde ruat a terra
segundu sa leze fisica de sa gravidade universale de Newton. Nissunu penzat chi issa
pothat abarrare a bolos in aria comente una mariposa. Tirande unu soddu, issu puru
nde ruet a terra segundu sa leze de sa gravitazione universale, e riguardu a custu
fattu no est po nudda diferente de una pedra. Masprestu no ischimus inantis cale de
sas duas fazes, rughes o capos, una orta ruttu a terra issu hat a mustrare. Medas
esperimentos presentan una caratteristica chi si narat deterministica, e ateros nde
presentan una diferente chi si definit aleatoria o stocastica o casuale. De sos primos si
narat chi si si connoschen in modu prezisu sas cundiziones iniziales si podet inzertare
chena farta peruna comente acabat su risurtadu; de sos segundos custu no est
possibile, non solu ca sas cundiziones a prinzipiu fun incarculabiles in modu
prezisu, ma si s'esserat pothiu faer custu carculu, sa natura e totu de s'esperienzia
esaminada, po carchi resone prufunda non si lassat contare cun d una previsione.
Tirande a susu de una mesa unu dadu, in d onni parte e logu de custu mundu si podet narrer
chi, a segundu de sa forza chi si ponet in su tiru, su dadu o si firmat in susu de
sa mesa o nde ruet a terra. Custas duas possibilidades, ddas podet valutare e cumprobare
chie tirat. Si cheret chi su dadu abarret in pitzu de sa mesa ponet pagu impetu in
su tiru, si cheret chi su dadu nde ruat a terra ddu tirat prus a forte. Unu ispettadore no
connoschet inantis de su tiru s'intentu de su tiradore, e tando po issu no est possibile a
faer una previsione sensada a riguardu de su risurtadu: chi su dadu abarret, a pustis de
su tiru, in susu de sa mesa o chi nde ruat a terra funi po unu ispettadore chi no
cuminigat cun su tiradore duas modalidades diferentes e ambas duas, in linea de prinzipiu,
possibiles a sa matessi manera. Sa cosa mudat de aspettu si su tiradore narat a
s'ispettadore comente tirat: si narat tiro a bellu, tando si podet faer sa previsione chi
su dadu abarret in pitzu de sa mesa, si narat tiro a forte s'agatan tantas arresones po
ritenner chi su dadu nde ruat a terra: si podet narrer chi su haer pagas novas de
unu esperimentu ddu classificat aleatoriu masprestu chi deterministicu. Si totu
s'informazione possibile esserat pothia esser valutada su risurtadu de s'esperimentu haiat
a esser pothiu cunsideradu deterministicu, ma si po comente custu no est possibile
tando abarran semper caratteristicas aleatorias in d'onni esperienzia.
Nois iscridimus e
faeddamus de probabilidades, mancaris chi in limba sarda custu faeddu no s'agatet
frecuente, e intendimus cun custu termine unu cunzettu tecnicu de una parte de sa
matematica, chi s'impitat de misurare cale podet essere una aspettativa chi carchi cosa
s'averet intro a unu tempus delatadu. Medas bortas fartat sa abilidade de sa persona a
misurare in manera diretta unu risurtadu, po esempiu ca una esperienzia no est istada
fatta, e mancari est cosa de importu po sa scienzia a ischire cale haiat a esser istadu su
risurtadu. De custos fattos e de tantos ateros s'impinnat su carculu de sas
probabilidades.
a
sighire...