- Part-time d’un pinziunatu
- (Premio
speciale per la poesia dialettale)
- di Pino Lo Sciuto
-
- Oh, beddra matri chi sugnu priatu
- ca pi cummattiri la lagnusìa
- un travaggheddu mi l’haiu attruvatu.
- È senza orariu, comu piaci a mia,
- pagatu bonu, ma… stuppativ’aricchi,
- …da mé sacchetta, e su cavuli amari:
- chiossà faticu, chiossà nesciu dinari.
- Du voti a simana, d’estati e d’immernu,
- siasi chi chiovi o chi u suli scattìa,
- ammuttu i carrelli d’un Supirmircatu.
- Chiddri vacanti d’arrisittari?
- No! Chiddri chini di roba d’accattari!
- Simili tali e quali a un nannareddru
- ca n’ carruzzina passìa lu picciliddru
- firrìu alluccutu m’menzu li scaffala,
- afferru chistu e chiddru e, adaciu adaciu,
- lu carritteddru è chinu n’zina n’coddru.
- Lu sciampu pi capiddri, ca ci voli,
- (sugnu tignusu e u cori mi nni doli!);
- la carta stiddri stiddri di Natali
- (puru su semu junti a Carnivali);
- un litru di rasoliu di vanigghia
- (iu sugni astemiu, …mi piaci la
- [buttigghia!);
- càlia e simenza, favi e cruzziteddri,
- un metru di caddrozza di sasizza,
- un paccu di canigghia e frummintuni
- ‘mmiscati a pruna sicchi e passuluni,
- (si chiama Muesli e veni di la Svezia;
- diciunu ca fa beni a la saluti
- e ghiri di corpu ogni matina,
- ma veramenti iu lu dassi a la jaddrina).
- E chi m’appizzu l’offerta speciali?
- Sunnu buatteddri di manciari pi li cani,
- nni pigghi tri casci e paghi sulu dui.
- (Veru è, di quannu murì lu braccu Liù
- armàla dintra nun ni tegnu chiù;
- ma si mittemu, un jornu un bastardinu
- mi veni appressu mentri chi caminu
- è bonu aviri prontu un muccuneddru
- pi fallu saziari, puvureddru!).
- E n’finarmenti, quannu par’a mmia,
- tisu tisu davanti a signurina,
- stinnicchiu tuttu supra lu bancuni,
- “C’è altro” m’addumanna e mi talia.
- “E chi m’è ‘ccattari tutta la putia?”
- Carricu com’u sceccu salinaru
- ‘mpajatu n’menzu l’asti da carrozza
- ringraziu a Diu ca m’arricampavu,
- ma mi dassi lignati ‘nta la crozza
- quannu m’addugnu ca… u pani mi
- [scurdavu!
|
|