O Derviees
A chi l’è in man
El nost paees ?!
Derf, paées disgraziàa,
Manegiàa dai asasin
Dai brou-brou e dai cretin
Dapertut disonoràa
Gh’è nessuna polizia
Imbratàa i mur de ca,
I contràad che fan pietà
Un paées come si sia.
Né gh’è moeul, né gh’è pontil,
Né sacristia, né reloc,
Rot i stràad e scur de nocc,
A gh’è gnanca un Asìil
Necessari, car Signour,
Disi minga pei fieu,
Che i nàs bravi al di d’incoeu,
Ma pei nost Ministradour.
Guera ai préet, dotour, comàa,
Voeuren pu gna ‘l Maestrin
Per pagura sti cretin
De avegh’ fieu ducàa
Al dotour gh’hin drée rabiàa
Perché ‘l maza poca gent;
Se gh’é no parturient
Gh’han de di de la comàa.
Anche ‘l noster speziée,
Che ‘l voer no soministrà
Medesin de fa crepa,
Il le voeren foeu di pée.
Pel boun orden gh’é comand
Che se déef lasà girà,
Su e giù con libertà,
D’ogni sorta de peland.
Dé stàa vert i osterì
Tuta nocc a fa balà
E d’andàn a bacanà
Tutt i nocc pei noster vìi.
E magari de ciapàss
Tra de lour i giovinott
E poeu dì che l’è nagott
Anca ben ch’i se mazàss.
Che se deva rispetàa
I ciuochée e i malfatour;
E i person pusée d’onour
S’abien pur de fa scapàa.
Quan infati el nost prevost
L’ha metun in del Guanela
‘na famusa pelandela
Han tentàa de toeug el post.
A se n’ véed de ogna sort;
Proibìi, l’è ‘n fatto vero,
De andàn al Cimitero
A pregà pei nost por mort.
Proibìi ai funeraj
L’intervent di Confratei,
Di tosan, di Consorej
E perfin di nost bagaj.
Proibìi, ghe n’è ammò ?
Proibìi i processioun
E ogni sorta de funzioun
E poeu ‘l rest disemol no. Pòor paées, a chi l’è in man?
A Bicocch, tich-tech, cisoeu,
Codegh, crep, ronch, petuleeu,
E a ‘n postribol de putàn!
Cef de lader, d’impicàa.
Mùus de can e crap pelàa,
Orecc d’asen, gent malfàa
Con di oeucc de gat copàa;
Certi sagom, certi facc
Che somejen qui di boeu,
Qui de vacch o i so fioeu,
Qui di best i pu selvacc.
Acidento, che ‘nimaj,
Che gh’hem chi nel nost Comun!
Ma a pensàa che sem sta nun
Col nost vout a nominaj
Quasi quasi gh’han resoun
De vegnim coi pé adòss,
E dim che sem baloss
Quan invece sem cojoun,
E magari che i porscej
Hin no lour e invece num
E che in punto a boun costum
Hin lour soj i ver modej;
Quand tucc veden e tucc san
Ch’hin stàa lour coi so impress
Ch’han consciàa el nost paées
Pien de lader e de putan. Guarda là qui dùu pelàà:
Hin i cap di nost bordej
Vun e l’olter du porscej
Che compagn ghe n’è mai stàa.
Vun el gh’ha un testament
Con du oeucc de can rabious
Con un mùus inscì pelous
Che a vedél el fa spavent.
Una ghigna de patibol !
Ma se sa che ‘l animalucio
L’è fioeu d’un certo Ciucio
Un avanzo de postribol.
El se da un’importanza
Come ‘l fuss un gran talent,
E difati l’è ‘n portent
Un fenomen d’ignoranza.
Dove l’è sto so talent?
La patenda del mestée
L’ha comprada coi danée;
Da per lu ‘l sa fa nient:
L’ha de cour de scia de là
A fas fa i so strument,
Fina tant che i so client
I se met a sospetà.
Così che effettivament
El po no in certo qual modo
Voré dì: no ghe n’impodo
Se imbroij tanta gent.
Perché quand un por Nodàal
El sa no la profession
El po ‘ndà a sciuscià bugnoun
In servizij all’Ospedàal.
Ma pur si ghe l’ha ‘l talent
de savé fa l’impostour
con i préet e col Signour
E inganà la bona gent.
L’Arcivescov de Milan
Quand l’ha vist st’orangotan
In ginoeucc basagh la man,
Ah, l’ha dit, che boun cristian!
Per dach studi a vun di soeu,
L’se fa dà dal Count Sorman
Tutt a forza de ingàn
La pension di por fieu.
L’è avar compagn de Giuda
Come ‘l Paroch de Coren
Che el vend perfina i pen
Di usei che ‘l gh’ha de muda.
[E anca ben che ‘l sia prevet
L’è papà de du fieu
Che lu ‘l diss ch’ in minga soeu
Per no véegh com lour di debet
Intant sti du bagaj
Van intorno tutt strascià
A cercà la carità
Ma nessun i voeur jutaj
Che la gent maligna e furba
I ghe diss: andé a Coren
Che coi strunz e cont i pen
L’ve mantegh el vost pà Turba.]
Basta dì che stò Giudé
Per no spend de quai dané
Dre Comar e spizié
Gh’è crepà an la so mié.
Anch’adess ch lu el gira
A cercà de toeu mié
L’è no quest el so pensé
Vergot oltro ‘l ga de mira.
Lu de donn ghe n’ha assé,
Ghe n’ha tante chi adré
Che ‘l servisen de mié,
Quel che ‘l cerca hin dané.
O Luisa, vegn scià ti
Se regordet? Cunta su
Cosa l’è che te vedù,
Sa la fà el to marì;
Quand l’andava a mont de nocc
A trovà la rizolin
Con in man el lampedin
E in sul nàas i so quatr’occ.
E poeu quand el carezava
La so cara Mantovana
E ti invece, sto putana,
El te ruzava e ‘l te picava.
Se ricordet, povera dona,
quanti volt el to marì,
Nel to lecc al post de ti
‘l gh’ava lì una birbona?
Quanti volt che te piangiù
Quand che lu per castigaj
El ghe dava ai to bagaj
Bot putan e pegn nel cù?
Ie sarava dent a scur
El gh’ha fa patì la fam?
Che dolour per una mam
Vedé un pader inscì dur.
Ghe n’ha inscì de cuntà su.
Ma ghe vegn de magunà
La po gnanca pu parlà
L’ha pagura ammò de lu.
I sentùu, o Derviées ?
‘dess almen podi conoss
A che razza de baloss
A l’è in man el nost paées. De quell’otro peladel
Ocour de fa la storia
Che lu stess el se ne gloria
De vess lu el pegg porscel.
E defati lu ‘l descour
Ch’ hin a so desposizioun
Tucc i donn del nost Comun.
Porca can che bel onour!
Ma se gh’è de quai tusan
De quai donn ch’han no vergogna
De cour drée a sta carogna,
No hin olter che putan.
Lu ‘l se créed vergot de bel
Perché ‘l gh’ha di bei guantit
su tucc quater i sciampit;
Ma l’è semper un porscel. | De porscel el gh’ha el mùus
De porscel el portament
De porscel el sentiment
De porscel perfin la vous.
Sentuf no come ‘l grugnis
Quand l’incontra un quai por crist
Che l’è minga in di so vest ?
Se ‘l podess le morderis.
Una nocc al ciar de luna
Ch’han vojàa un bel brental
pien de merda in sui spal
L’era lì insem a vuna.
Poveretto, l’è calvin
L’aria fregia ghe fa màa
E lu quindi ‘l s’é inciodàa
In sul co un baretin.
La disgrazia l’ha volùu
Che un dì un bof de vent
Gh’ha squatàa el testament
L’era biot compàa d’un cùu.
Lu ghe piass a fa ‘l gingin
Fa ‘l blagoeur, andàa a spass,
Vestis ben, fan dàa i ganass,
Ma ‘l gh’ha minga assée quatrin.
E savii cosa ‘l fàa?
L’ha tiràa el Codeghin
A imprestagh el so borsin
E in compens l’ha dichiaràa
Che ‘l se mett al so servizi
Lu ‘l ghe fa de galopin
De Arlechin, de damerin
Semper pront ai so caprizi.
El ghe diss che lu per lu
L’è el so servitorel
pront magari, sto purscel,
A lechegh el bus del cùu.
Che ‘l fa minga per vantass,
Ma in lavor de tafanari
L’è ‘n ingegn straordinari
Che compagn l’ha mo de nass.
E defatt sto porscel vaca
Per met foeura i patafiat
Contra i Toni e ‘l Formajat
El dopera fin la caca
El so papà el gh’ha resoun
De digh drée che l’è un porcoun,
Un schifous fanagotoun,
Vizious e ‘n gran lizoun.
E l’è propri in realtà
un refund de società
‘l disonour de la so ca
‘l crepacoeur del so pà.
E per giunta sto bufoun
El voeur di che se in paées
Gh’é ammò un omm de pées
L’è lu quel: el gh’ha resoun.
Come dì che senza lu
Se ‘l fuss no che lu ‘l lavora
El paées el va in malora
E de ben no ghe n’é pu.
I so soci verament
Quan i veden che l’è scià
Sto factotum de città
Ghe fan tutt i compliment.
El gh’ha insomma el bicochin
Tucc i bei abilità
I virtù, i qualità
Del so meter Codeghin.
E guardée combinazioun
Tucc e dùu i gh’ha i so mamin
Ch’hin magari do cretin
Ma hin pien de religioun.
Lour in ca gh’han l’altarin
Dedicàa a santa Bambina.
Alla Messa la mattina
Manchen mai i do sciourin.
E coi so divozioun
Colla sua gran pietà
Gh’han vùu el merit de razà
De sto sorta de porcoun Per fas mett consigliér
Un por stupid imbecil
L'ha promiss de fa 'l pontil
E fa béev di boun bicér.
Quater mées l'ha seguitàa
Tucc i dì a pagà disnà
A tucc quj che dev votà
Fin a che l'han nominàa
E l'han mis in del Comun
Come 'n om de gan rispett
Anca ben che l'è interdett
Né 'l da cunt di so azioun.
Ma 'l pontill? - o i me car ciol,
Si speciée ve 'l meta giò,
Lu 'l respound che lù l'è no
Responsabil di so parol.
E l'é vera, l'è un fat
che 'l gh'ha lì 'n certificàa
In sul qual l'è dichiaràa
Che l'è un pover mentecat.
Poeu l'han miss anch'in di scoeul
Lu 'l credeva sto somar
De ves lì coi nost scolar
Come 'n mezz ai bestioeul.
Ma i fioeu nomà a vedel
Come semper lu ghe piàas
Col didin spazass el nàas
E majas el so margel,
A vedel con qui du oeucc
De falchett, con qui orecc
Che i par qui d'un asen vecc
Con in co quel quatapioeuc;
A sentil poeu in la scoeura
Quand el parla sto asnoun
De sti nost ministrazioun
Che sproposit el dis foeura;
I fioeu ch'in no tambour
I l'han subit giudicàa
Che 'l bestioeu e l'è detàa
De vess noster Assesour. A gh'è pu de fas stupour:
L'autour de quel disaster
Sucedùu in del teater
Quela nocc ai vundes our
(Come 'l dis el monument
Che gh'è dent nel Cimitero
Do' gh'è su tutt per intero
Descrivùu l'avveniment;
Che hin stàa precisament
Tucc brusàa in conseguenza
dell'inconscia imprevidenza
De quel Sindech prepotent)
Ch'è stàa Sindech quater mées
E 'l diseva che 'l pedroun
De la Gesa e del Comoun
L'era lu e no 'l paées,
E in la so ministrazioun
L'è mancàa do mila franch
Senza mai che dell'ammanch
L'abia dàa 'na spiegazioun,
Che in America lu 'l sa
I danée che 'l ghe gh'ha levàa
A quel soci ch'è crepàa
Nel moment de tornàa a càa.
Che poeu 'dess n'ha fàa assée
Nel coléeg che gh'è a Vendrogn
Che gh'han dit : el me car Togn
Torna a fa 'l materassée.
Anche questo, sissignour,
L'han accolt con gran onour
L'han metùu Conciliatour
E poeu dopo anche Assessour.
Mi scometti, son sincer,
Se 'l ne fess ammò 'n disaster,
Num me disen gnanc'un pater,
Li 'l nominen Cavagliéer. Ma el pegg al dì d'incoeu
L'è vegh Sindech quel talent
Che 'l ghe ruva solament
A fa carta e fa fioeu.
Per no di l'abilità
De fa pouf e mai pagai
E' ve' poi d'impotecai
Sui fioeu e soura i cà.
Che però gh'hem semper vùu
Per nost Sindech certa gent
Che 'l so merit verament
L'è fai cour a pegn nel cùu.
El par fina un destin
Che ghe sia mai nussun
De fa Sindech in Comun
Foeura che de sti cretin
A l'è minga per nagot
Che i noster contadit
Ciamen Sindech i asinit
E i perteghen giò de bot.
A quest chi gh'è già rivàa
di rimprover maledet
Dal lustrissem sciour Prefet
Che 'l dovréef 've renunziàa
Ma lu invece 'l gh'ha de sta
Per la semplice resoun
Che gh'è minga un imbroioun
Peg de lu de catà scià Gh'è de quj che voeur cagà
Che l'han lì sul bus del cù,
I se sforzen, poden pù,
Finalment la sbaten là.
Ma pei nost l'è minga inscì:
Lour han semper de calcà
Senza mai podé cagà
E ghe toca de sta lì.
L'è chi 'mmò el nost prevost
El maester e 'l dotour
E comàa a dispet de lour
Hin chì tutti al so post;
La comàa a fa nass bagaj
El prevost a batezaj
E 'l maester a ducaj
E 'l dotour a medegaj
E se l'è per desfesciaj
Gh'è chì semper el Togn Porta
Na toeu scià 'na bona scorta
E 'l fa prest a sbrusataj.
St'ultim facc, o Derviées
L'è ammò el migliour
Che sti nost Ministradour
Poden fa al nost paées. |
Documenti
Inizio pagina