Oua, mentre se treuvavan in te quello posto, son finìi  pe' lê i giorni do parto. A l'ha daeto a-a Iuxe o sò primmo figgieu, a l'ha ingheuggéito in te de fasciueue e a l'ha misso in to posto dovve mangiava e bestie, perché no gh'ëa posto pe lô in te l'albergo.

In te quella region gh'ëa quarche pastô ch'o stava adescio a-a neutte pe' fâ a guardia a-e sò bestie. Un angeo do Segnô o se gh'é presentòu   davanti e a gloria do Segnô a l'ha ingheuggéiti de luxe.

Lô se son spaventae tanto, ma l'angeo o gh'ha dïto: «No stae a avéi puia, ecco mì v'annunçio  'na grande feliçitae, ch'a saiâ de tutto o popolo: Ancheu l'è nasciùo in te çittae de Davidde un Sarvatô ch'o l'é o Cristo Segnô. Questo pe' voiätri o l'è o segno: treuviô un figgin ingheuggéito in te fascieue ch'o sta là dovve mangia e bestie».

E subito con l'angeo l'è camparïo un gran numero de l'esercito celeste ch'o lodava Dio e o dïva: «Gloria a Dio in to ciù erto di çê e paxe in taera a-i ommi a-i quae Lê o veu ben».

Appenn-a i angei son andaeti via pe' tornâ in çê i pastoî divan fra lö:

«Andemmo finn-a a Betlemme, vedemmo questo faeto che Dio o n'ha daeto moddo de conosce».

Son donca andaeti sensa pensäghe tanto e han treuvòu Maria e Gieuxeppe e o figgin ch'o l'ëa dovve mangiava e bestie. E doppo avéilo visto, han contòu quello che gh'ëa staeto dïto do figgieu. Tutti quelli che han sentïo se son mäveggiae de cöse che i pastoi gh'avéivan dïto.

Maria, da parte sò, a se tegnîva tutte queste   cöse meditandole in to sò cheu. I pastoî poi se ne son tornae glorificando e lodando Dio pe' tutto quello ch'avéivan sentïo e visto, comme gh'ëa staeto dïto.

Lo 2,6-20