In questa rubrica vengono pubblicate poesie di autori famosi e non. Mi piace inaugurarla con Eduardo, per rendere omaggio ad un poeta del passato, uno che ha saputo assorbire e comprendere le ansie degli uomini, le loro gioie e i loro dolori, ma soprattutto ha saputo interpretarli. Poi, un omaggio alla mia città, Napoli. Da qualunque parte provengano saranno versi destinati a rimanere nella storia, quasi -----scolpiti nella roccia.

v Eduardo

v Salvatore di Giacomo

v Edoardo Nicolardi

'O rraù

'O rraù ca me piace a me

m' 'o ffaceva sulo mammà.

A che m'aggio spusato a te,

ne parlammo pè ne parlà.

Io nun songo difficultuso;

ma levàmmel' 'a miezo st'uso.

Sì, va buono: cumme vuò tu.

Mò ce avèssem' appiccecà?

Tu che dice? chest'è rraù?

E io m' 'o magno pè m' 'o mangià…

M' 'a faje dicere na parola?…

Chesta è carne c' 'a pummarola.

1947

E allora bevo…

Dint' 'a butteglia

n'atu rito 'e vino

è rimasto…

Embè

che fa

m' 'o guardo?

M' 'o tengo mente

e dico:

"Me l'astipo

e dimane m' 'o bevo?"

Dimane nun esiste.

E 'o juorno primma,

siccome se n'è gghiuto,

manco esiste.

Esiste solamente stu mumento

'e chistu rito 'e vino int' 'a butteglia.

E che ffaccio,

m' 'o pperdo?

Che ne parlammo a ffà!

Si m' 'o perdesse

manc' 'a butteglia me perdunarrìa.

E allora bevo…

E chistu surz' 'e vino

vence 'a partita cu l'eternità!

1973

Io vulesse truvà pace

Io vulesse truvà pace;

ma na pace senza morte.

Una, mmiez'a tanta porte,

s'arapesse pè campà

S'arapesse na matina,

na matin' 'e primavera,

e arrivasse fin' 'a sera

senza dì: "nzerràte llà!"

Senza sentere cchiù 'a ggente

ca te dice: "io faccio…, io dico",

senza sentere l'amico

ca te vene a cunziglià.

Senza senter' 'a famiglia

ca te dice: "ma ch' 'e fatto?"

senza scennere cchiù a patto

c' 'a coscienza e 'a dignità.

Senza leggere 'o giurnale…

'a notizia impressionante,

ch'è nu guaio pè tutte quante

e nun tiene che ce fa.

Senza sentere 'o duttore

ca te spiega a malatia…

'a ricett'in farmacia…

l'onorario ch' 'e 'a pavà.

Senza sentere stu core

ca te parla 'e Cuncettina,

Rita, Brigida, Nannina…

Chesta sì…Chell'ata no.

Pecchè, insomma, si vuò pace

e nun sentere cchiù niente,

'e 'a sperà ca solamente

ven' 'a morte a te piglià?

Io vulesse truvà pace

ma na pace senza morte.

Una, mmiez'a tanta porte

s'arapesse pè campà!

S'arapesse na matina,

na matina 'e primavera…

E arrivasse fin' 'a sera

senza dì: "nzerràte llà".

1948

Omaggio a Salvatore di Giacomo

Pianefforte 'e notte

Nu pianefforte 'e notte

sona lontanamente,

e 'a musica se sente

pe ll'aria suspirà.

E' ll'una: dorme 'o vico

ncopp' a sta nonna nonna

'e nu mutivo antico

'e tanto tempo fa.

Dio, quanta stelle cielo!

Che luna! E ch' aria doce!

Quanto na bella voce

vurrìa sentì cantà!

Ma solitario e lento

more 'o mutivo antico;

se fa cchiù cupo 'o vico

dint' a ll' oscurità.

Ll' anema mia surtanto

rummane a sta fenesta.

Aspetta ancora. E resta,

ncantannose, a penzà.

Testamento

di Edoardo Nicolardi

Quanno mor'io, chiagnìteme

nu quarto d'ora e basta.

Che m'atterrate all'ùnnice?

Salute e bbene! 'e ddoie menàte 'a pasta.

Se sape, 'a vita solita,

cchiù o meno, su per giù.

E allora fosse 'a ridere:

pecchè so' morto nun magnate cchiù?

Facìteme n'esequia

semplice quanto maie:

'o carro 'o municipio;

te mmòccano 'int' 'o carro e te ne vaie.

"A'àààh, Baccalààà…!" s' 'o portano

p' 'e sicule, 'o pueta.

Meglio accussì! credìteme

ca sparagnate 'a roseca e 'a muneta…

Pecchè facendo 'annunzio

ncopp' 'o giurnale ('e 'a fa

cinquanta lire 'a lìnia)

na mille lire sempe se ne va.

Ll'amice intanto 'o lleggeno

e ognuno legge e penza

"E chisto è n'ato esequie!

Comme nun vaie! nc' 'è 'a j'. Pè cummenienza!"

E allora vuie pigliasseve

nu carro 'e primma classe…

Sciure, carrozze, prièvete…

cammariere c' 'o tubbo e 'o fracchisciasse…

E 'o mpiccio 'int'a 'stu vìcolo?

E 'a folla ca s'auna?

E amice ca sfastédiano:

" Che ddio! s' è ditto a ll'ùnnice e mo' è ll'ùna!

E che maniera! è inutile,

chi è scucciatore, more

scucciànnote nzì a ll'urdemo!

sinò t' 'o scuorde ch'era scucciatore!"

E se un amico, in lacrime,

sulla composta bara,

ti fa l'elogio funebre?

Poveri muorte tuoie! chi ll'arrepara?

E si accummencia a chiovere

nfromme se move 'o carro?

Madonna chili priévete!

Ggiesù chili cumpagne c' 'o catarro!

Quanno mor'i', ca 'o miedeco

stendesse ll'atto 'e morte,

e… nun facite nchiudere

manco 'o miezo purtone a 'o guardaporte!

Si me vulite chiagnere

nu quarto d'ora e basta.

Che m'atterrate all'ùnnice?

Salute e bbene! 'e ddoie menàte 'a pasta.

torna all'inizio

Torna a casa