Sarà per el fato che gò na passiom
per tute le robe che riguarda la Storia,
ma mi me sento portà per na disposiziom
ale imprese de mar che so quasi a memoria.

Se ‘m moment ascolté ve dirò quel che pòss
de Cristoforo Colombo, taliam genovese,
che come el so solit per poder far qualcòss
la dovést nar a l’aestero, lontam dal Paes.

Chi non so se me spiego e se rendo l’idea
ma da qualche temp è vegnù for na resom
che se ghè um che vol aiutar l’umana famea
o i lo ciapa per mat o i lo fica en presom.

Ma miga per questo po’ i resta contenti,
nò, perché dopo i se cruzzia, i fa zento scéne,
i voria cocolarlo, farghe dei monumenti,
ma ‘ntant quel l’è mort en méz ale pene.

Cossì, co sto andazzo, pur Colombo pòr òm,
per pù de des’ani el va avanti e ‘ndrio
da potenti e scienziati che no sente resom
ale idee da na vòlta dover darghe n’adio.

Ma vègn anca ‘l dì, dopo tant tribolar,
che ‘l re de Spagna, tant per farlo content,
el lo ciama davanti per poderghe parlar
senza preti e dotori che ghe sia lì present.

"Maestà, - ghe diss Colombo, - che la tèra sia rotonda
mi su questo no go dubi e se trovo la so stima,
ciapo su la via del mar e su onda dopo onda
mi ritorno ancora chi en do che èro prima.

Per dirla en do parole, fu per merito dei ovi
e de quela regina si tant brava a cosinar,
se l’ha ciapà equipagio e tre legni quasi novi
che za ‘ncora ‘l dì drio i fileva via sul mar.

Ma adèss disente ciar: ghe sarà de capitani,
artisti e zent de tèsta che a prodot l’umanità,
ma nessum come noaltri, diga pur i polegani,
i ga la fantasia che da noi la è chi de cà.

Noaltri el Genio e l’Arte i gaem chi sule mam
e l’è propi come rider enventar qualche trovada,
vardè mò quei zo al Governo, i stessi da quel’am
se no i ‘nventa tuti i dì ogni tipo de monada!

Ma lassente star quei lì e tornente en poc endrio
a quele tre barchete disperse en mèz al mar,
a Colombo tut content, sì, ma i so òmeni, perdio,
tuti stufi e spaventadi i cominzieva a brontolar …

E via e via e via e mai se vede gnent,
dal dì gh’è mar e sol, de not gh’è mar e stele.
No gh’èra altro rumor che ‘l zifolar del vent,
el tonfo dele onde, el s’ciòco dele vele!

Pareva, sì, ogni tant de veder via qualcòss
sul fil de l’orizonte che pareva empiturà,
ma come i ariveva, ciapadi dal strangoss
gh’èra ancora ‘n altro mar pù grant e sconfinà!

E su sto novo mar ognum se sente en nano,
ghe vèm la tremarela, el cor deventa sgnèch!
"Forza, nente avanti! – l’insiste el Capitano.-
Bisogn trovar la tèra a costo el sia pocèch!

La è chi da qualche banda, fentene coragio,
no pol finir ‘l mondo de colp come fuss gnent!"
"Spetem ancor tre dì, - risponde l’equipagio, -
se no vedem qualcoss voltem el bastiment!"

E l’è sta ‘m bem per tuti, perché sul terzo dì
engual che ‘l sol el steva a tufarse zo nel mar,
en zic che spaca l’aria de ‘n marinar stremì
el passa entra le vele e fa tuti sussultar.

"Tèra, tèra, finalmente!" Adess i ziga tuti
dai ponti dele navi voltade per quel vèrs,
ognum se sbrazza e ride, desmentega i dì bruti
e i loda l’Amiraglio e quel mondo sul rovers!

E sì perché sta tèra, de là dal vecio mondo
la èra su l’opòst da ‘n do che i è partidi,
che per capirghem fora i ha fat el mapamondo
se nò anca i pù studiadi i restev ensemenidi.

Cossì, che quando ormai no i ghe la feva pù,
i sbarca su na tèra che i basa zo ‘n gatom,
i vede en sac de zent tuta nuda da chi ‘n su
e dal color che i ga i pensa i sia ‘n Giapom.

Ma la tèra che beleza e che piante gh’era là,
gh’è banane che pareva mortadele tacae su,
gh’è patate e zèrte foie de tabac za maserà,
gh’è perfim la ciocolata che no i eva mai bevù.

Che ghe sia gran varietà de verdure bone e strane
i lo vede sula taola ‘n do che i magna tuti i dì,
gh’è polenta, gh’è bèi piti, gh’è nosèle americane
tòlte su per passatemp, che se cose lì per lì.

Qualchedum prova a tastar zérti fruti che par pomi
dai colori zaldi e rossi come i fussa empiturai,
no i lo sa quei pòri zoni che i se ciama peveroni
e i è boni da magnar quando i fussa bem scotai.

Pò i se conza zo en salata pomodòri bei mauri,
tuta roba trovaa lì, vegnua su come dal gnent,
i se magna pò altra roba tant per esser bem sicuri,
ananassi e angurioni tut per far esperiment.

Per curarse le magagne de quel viazo benedet
gh’è la canfora boida da spalmar sora la pèl,
gh'è perfim la valeriana e basta beverne en gozet
per sentirse rinfrancai tant che par tocar el ziel.

No parlente po’ dei fiori che no i eva mai vedù,
i amarili e i filodendri, le petunie e le verbéne,
i nasturzi e le orchidee po’ i s’à messi a torle su
per portarle anca a so casa quando i leva le cadene.

Ma a confonder l'Amiraglio, bisògn dir la verità,
l'è le spezie de garòfol, de canèla e anca pever,
tuta ròba de l'Oriente, che se alor la gh'èra là,
no pol esser che le Indie e l'eror l'è bèl da veder.

E Colombo dopo en mes l'èra ancora frastornà.
O Signor sa devo creder, a l’Oriente come ‘l par
o saràlo quela téra che da sempre mi ho sognà,
tuta verda, calda e béla che me feva sospirar?

Co sto dubi nela testa che no neva for de ment,
vèm el dì che 'l fa ritorno cole navi vèrs la Spagna,
per parlarghe a la regina de quel grant ritrovament
dove par da zèrti aspèti sia '1 paes de la cucagna.

Questo almem lu ghe pareva a restar quei po de dì
e 'mparar dai abitanti le ricète de cosina.
Tant che po’ per sdebitarse el l’à fati lì per lì
tuti quanti dipendenti del so re e de la regina.

Ma digo mi, e ghe voleva tant a quela zent foresta
de dirghe che l’è ‘m Merica, nel mondo tant zercà,
perché Colombo, adèss con quela idea ‘n la testa
el s’à magnà ‘m po ‘l credit de mèza umanità.

Ma se i lo sa anca i bòci che fa l’elementari
che quela l’è l’America del centro e tut el rèst!
Sol Colombo, pòro cam, tut per quei madonari,
el scopre na naziom e no ‘l l’à mai saèst!

E sì, perché i ‘gnoranti che no capiss mai gnent
e i ciacera nel bar davanti a na bicera,
no i sa che de cartèi no gh’era pròpi gnent,
no gh’era segnaletica né ‘n aria né per tèra.

E alor sa gh’è da dir, la colpa de chi èla?
Lu l’à trovà la tera, la pu scondua che gh’è
col genio e col coragio tut en na miscela
e po’ l’à dit a tuti: Vegnì pur chi e vardé!

Mi no ghe meto lengua perché no se sa mai
còssa pol suzeder ‘n de ‘n mondo che l’è nof
e come chi ‘n l’Europa anca li gh’è i tananài,
resom per cui capì, mi voi restar al strof.

Mi lasso pur che i creda che no sò pròpi gnent,
de esserme sbaglià nel tòr la direziom,
e forse voi sperar se i vèm chi da sta zent
che i vègna da turisti e nò per ‘n invasiom!

No volerìa mai veder le file dei coloni
che core dapertut en longhe processiom,
che scava e che distruge, che copa zo i paroni
come l’è de sòlit ‘n do gh’è qualcòss de bom!

Cossita lu ‘l penseva, mi credo de capir,
nel viazo de ritorno che adèss l’è come rider,
e se gh’è qualchedum che me vol contradir,
savè cossa ghe digo: Che ‘l vaga a farse frizer!