le ombrie ne l’erba

le pesa più del fén

e da le sése de robinie

sgola via foie de roaro

come pìtari spaentà,

quando che a sera

scapa via el sono

e a caval de la malinconia,

sensa bater porta,

el sbrissia via

su le ringhiere de la note,

ti çerca de far piàn, marso,

col to fremegar de piante,

col to cantar de galine,

col to rebegar de anare,

ti çerca de far piàn, marso,

che le me voie i’è farfale

che no se posa mai

e sgola a desfarse

drento l’infinito,

molando ne l’asuro

polvarine incolorie de ale.

Fa piàn, marso,

che come un fior che spanisse

voria lassarghe al vento

solo bon profumo,

fasendome sbrissiar sora la testa

solo ‘na caressa timida

de luna.

Fa’ piàn, marso!