Stasera qua
darente a l’Adese
ogni stela del cel
par che la voia
essar strucada fra i déi.
L’aqua gargòta a pian,
sgranando sui salesi
terseti de litanie.
Gh è malinconia
ne la canta destante
del vecio vogador asuro
naufrago fra le stele,
parole sbrissiade da lavri
pieni de sogni.
L’arfio del cel
sgola co le ale
de tute le foie.
Le umbrie i ‘à impirado
petali de luna ciara
frameso i cavei neri,
e i ragi
cusisse maie de teneressa
desfando sogni de cera.
Proprio stasera qua
darente a l’Adese.