Accatte le cozze de Tarde, ca sò le megghie. Dope ca le sì spedecchiate le rascke iune l'une pe levange da sope a le scorze l'erve e u terrene, le lave asseduate e che na grambedde le iabre facenne scì u frutte tutte jind'a na scorze asselute e le mitte 'o queste, adacchesì iaperte, jind'a na tiedde acchemegghiate d'acque.
Pelze le patane (chidde a pasta gia1le sò le chiù adatte), le tagghie a fedde nu picche fattizze e le mitte pure chisse jind'a na zeppiire acchemegghiate d'acque (assenò devendene gnore).
A cusse punde pigghie u granerise (pe la misure te la vìte tu a seconde de quande presune site a taue e de chedde ca mangiate) e nge dà na menza lavate.
Mò pigghie na bella chedde de pedresine, d'acce, iune o dù specudde d'agghie (stà ci iuse la cepodde), mittete vecine la grattarole cu fermagge grattate (megghie u pegherine), pepe, sale, pemedore senza cuere e acquanne tutte iè pronde acchemmiinze astenne sott'o tiane (megghie ce iè de crete, ma te puete arrangià pure che cudde d'alluminie), le pemedore spizzate a muerse a muerse; accunze cu agghie (settile settile ca s'hava sende u addore ma mmocche no nz'hav'acchià), acce, pedresine, sale, pepe, fermagge e iegghie ne la mesura giuste.
Sop'a chess'acchenzate nge asseduisce na felare de patane e sope a le patane le cozze che la scorze sotte e u frutte sope, senza cuà l'acque addò le teniive.
Sop'a le cozze sparnazziisce u granerise e accunze n'alda volde che pemedore e l'alde cose nziim'a nu belle piene de fermagge e n'acchenzate d'egghie chiù abbondande. A l'uldime nge mitte n'alde felare de patane e accunze accome apprime; de chiù nge mitte nu piene abbondande de meddiche de pane grattate {nguocchedune acchemogghie che na felare de checozze -acquanne iè la stagione -tagghiate a feddozze tonne).
Mò no nde si sckerdanne ca u granerise -ca si mise crute -chescenne gnotte l'acque e pedenne, mendre la tiedde sta jind'o furne, a dà sta attende ad acchiamendà ca no nz'assuche assà; ce nge vole, ammine- da nu queste -nu squicce d'acque a la volde; ma fa' attenzione ca la tiedde no mene bredose bredose.
Acquanne acchemmiinze a sende u uaddore, no nde facenne pigghià da le chenvelziune; assagp;e nu picche, pe vedè ce iè cotte 'o punde giuste, e live d'o furne pe falle sfreddesce percè, troppe bollende, no ndande se guste.
