Siu Dario Anghilante. Naisso a Sant Peire en Val Varacha (una des Valadas occitanas) ental 1947.

Ai totdia agut, sal plan de la música, una corrent d'aire dins maison. Mon paire Masino, despuei sa joinessa aimant de la música, es estat sonaire de violon, tromba, mandolin, dirctor de banda e de corala, ensenhaire dins de cors populars, e a començat apres la 2ª guèrra a compausar de chançons e dal 1962, abo "Charamalha mai", tanben en occitan.

Ai bautelhat dins ma joinessa entre la música classica (violoncèl, chant liric) e lo teatre e, dal 1971, ai enchaminat a chantar en òc. Siu estat lo prumier chantaire en occitan dins las Valadas e ai virat per una detzena d'anadas dins lhi país acompanhat d'una guitara o d'estruments populars. Ai jai d'aver fach coneisser la musica occitana a un baron de monde e, entr'aquesti, a Sergio Berardo, que aüra es un "grand de la música" des valadas.

Eron lh'an '70: dins las valadas começava plan planet la cosciencia d'esser occitans e d'aver una cultura e una lenga prestijosas que chalia salvar. Ai la presunçion d'aver donat mon ajuda a n'aqueste moment emportant.
La semença era espatiaa e a ben brulhat.
De novèls sonaires de música populara renaission en totas valadas quora lhi vielhs sonaires populars eron aqui per despareisser. D'escabòts de musicaires occitans se formavon e encuei i n'a mai que vint dins las valadas, las danças occitanas son devenguas aimaa da tuchi e las chançons en òc chantaas sus las plaças e dins lh'òstes.

Per un'autra detzena d'ans ai fach lo militant occitanista (M.A.O. e Ousitanio Vivo), mas dins lh'ans '90, chalgut far lhi còntes abo mon filh Peire e si amís que sonavon música occitana e que m'an relançat sus la plaça.


Te aquí LHI SONAIRES !!