Candu cumencia lu arru, all'abbaltura di la caccia, li cacciadori di la cumpagnia di la caccia grossa si dani l'appuntamentu a la sede pà fa la primma riunioni. Dugna duminica li cacciadori si dani l'appuntamentu pà cumincià la caccia di la silva istigata la dì primma. Tanti passoni andani cu li fusili a piddà li pusati, e l'alti cu li cani aspettani pà cumincià la caccia. Da poi di mezz'ora cilca, appena presi li pusati, li chirridori cumenciani a lampà li cani e a burrià pà cilcà di bucà li polci e a spignilli undi sò li pusati, fendi buldeddu, bucendi, tirendi in mezu a lu buscu undi sò li burri. Li cateddi cumenciani a iannì infattu a la raglia lassata da li polciavri furriendi la notti prima. Li cateddi più avanzani e più iannani, cantu più s'accostani a li burri e li chirridori facini ancora più buldeddu finz' a bucà li polci pà spignilli undi sò li pusati; dapoi di un pocu si intendini li primi fusilati, finuta la caccia tutti li cacciadori si aunini undi sò li macchini e facini li conti pà com'è andata la caccia, cantu polci ani presu e cantu sò li polci fadduti. A chistu puntu si torra a la sedi e chì si cumencia la festa magnendi e biendi, fendi li conti di commu è andata la caccia, sfuttendisi cun chissi chi s'ani faddutu li polci e fendi li cumplimenti a chissi chi l'ani presi, cuntinuendi cussì finz'a a la sera. A chistu puntu si cumencia ad usciani li polci e ad appruntà li palti di la carri pà cantu sò tutti li cacciatori chi ani paltecipatu a la caccia. La sera a taldu, sempri continuendi a magnà e a bì, vè ca canta, cà gjoca a la murra, ca torra a magnà e ca torra a fa li conti sviluti di commu è andata la caccia. A la fini tutti li cacciatori si dani l'appuntamentu a l'alti duminichi pà cumincià a caccià.