Cantadores de Torpè__________________________Contributos
Su 'e s'intender parte de una comunidade est unu sentimentu costante in su sinu de donzi torpinu. Sa zente de Torpè est orgogliosa de sas tradiziones chi at ischidu mantennere finzas a oje in die e de su faeddu lepiu e galanu chi la distinghet in totue. Nois, comente amministradores, amus postu in sos programmas nostros operas chi poteren azuare a salvare e a contivizare su patrimoniu culturale de sa 'idda. Est chin soddisfazione manna chi oje 'idimus pubblicadu unu trivagliu chi est 'istadu longu e fadigosu ca no est fazzile su recuperu de materiales poeticos chi a ispissu est remunidu in sas paraulas ebbia. Devimus custu libru a duos paesanos chi an tentu sa passenzia e sa volontade de curare cust'opera chi, semus siguros, rendet onore a sa 'idda de Torpè.
Duncas custu libru est 'istadu cherfidu e ispronadu dae s'amministrazione ei cust'impignu nostru lu dedicamus a totu sos torpinos ma prus de totu a sos pizzinnos de como chi pagu ischin, connoschen o ammentan de su tempus coladu, de sas tradiziones e de sas usanzias.
Semus cunvintos chi su chi sos mannos nostros nos an lassadu sian cosas de bonu de goglire e de ammentare, pro chi non sich'ismentighet "su chi nos apartenet" a cuminzare dae sa limba e dae sa poesia. S'isperanzia nostra est chi cust'opera siat pezzi su cuminzu e chi massimu sos zovanos sigan in su contivizu de sos valores culturales chi nos distinghen comente "Sardos " e "Torpinos".
Un'antologia de poetas, no est pezzi unu libru de poesias, est unu documentu inue s'abbistan s'istoria, sas tradiziones, sos valores culturales e soziales, sas peleas, sos fatos de sa vida de una 'idda e de una zona. Ca sos poetas in Baronia, comente in totu sa Sardigna, fin sa 'oghe de sa zente, sos distimonzos ascurtados de su tempus insoro, su mediu chin su cale si tramandaian valores e sentidos. In d'una Sardigna povera e, a dolu mannu, lassada pro seculos in s'analfabetismu, custos poetas cantadores sono 'istados s'unica froma de literadura sarda chi si siat connota. Oje chi, mancari a tardighinu, si chircat de recuperare cultura e limba, istoria e tradiziones sardas, custu travallu de Bustianu Pilosu e Efiseddu Pau nos paret de importu, meressidore de atenzione e de istudiu. Custu libru s'azunghet gai a sos ateros chi sa Comunidade Montana de sas Baronias at promovidu, azuendelos a bessire a campu, pro chi siet, che a cussos, ambassadore nostru e ispregu de s'arte e de sos valores umanos de sas nostras populaziones.
|
|