Cantadores de Torpè__________________________Efis Mattiu

Efisio Mattiu fit naschidu in Torpè in s'annu 1837 e nd'est mortu semper in Torpè su 15 'e martu de su 1883 a s'edade de barantases annos. Ischimus chi fit unu massaju, no ischimus sas iscolas ch'aiat fatu o si ischiat a lezer e a iscriere. No at lassadu fizos mascros (su fizu de doigh'annos sich'est mortu tres meses a pustis de isse) e gai sich'est mortu finzas su sambenadu de Mattiu chi est abbarradu pezzi comente istivinzu de sos fizos de sas netas. Est su primu de un'erenzia de poetes: Salvadore Craba Mattiu, Maria Zosepe Funedda, Efiseddu Pau, Tomeu Craba e ateros prus zovanos. De Efiseddu Mattiu, chi est su prus antigu de sos poetes chi inoghe presentamus, nos son abbarradas pagas cantones chi sono istadas goglidas dae Efiseddu Pau, sende ancora pizzinnu minore in sas iscolas elementares, suta detadura de sa mama Maria Zosepe Funedda. Sono totu cantones de amore diligas e dulches, cantones de 'antidu chin paragones altos, fraigadas totu inintro de sa tradizione de s'otichentos sardu, infirzidas de paraulas como pagu impitadas comente rellughida, diosa, irghenzu, ofeu, regiros e imprestadas dae s'ispagnolu comente ermosura, discansare, verdadera, paraulas e paragones chi s'azzapan in medas cantones de cussu tempus in totu sa Sardigna.
Son tres cantones postas in otavas, otavas guasi semper ligadas s'una chin s'atera ponzende paraulas de sa serrada de 'onzuna in su primu versu de sa sighente, comente si usaiat cantare in cussos tempos.