Cantadores de Torpè__________________Maria Zosepe Funedda

 

MARIA ZOSEPE FUNEDDA MATTIU

 

Naschida in Torpè su 30 'e santucaini de su 1878 e morta in Torpè su 2 de lampadas de su 1963. No ischiat nè a lezere, nè a iscriere, fit mastra cusidora de sos bestires de costumene pro feminas e omines; distinta ricamadora, su chi 'idiat chin sos ogros lu ricamaiat chin sas manos. Creschida in d'una familia de poetes aiat imparadu a cantare in poesia dae sende minore e in zoventura at cantadu s'amore, un'amore garrigu de peleas e de contrariedades: sa lontananzia, sa familia contraria, sa gherra. In custas cantones bessit a campu su carattere de Maria Zosepe chi nos ammustrat una frigura de femina forte, sigura, libera, chi non timet a narrer cantu sentit in su coro comente si cumprendet in custa otava:

Si menzus mind'at bennidu in podere
a mie non mi causat ispantu
de sa pessone mea so sa mere
nissune si maltratet gai tantu
po chi fago su meu piaghere
m'abrazzo s'allegria, su piantu,
s'a cantos mi fagheren chin s'ispada
un'ucone pro custu semper b'ada.

Ma sa sorte no est istada semper amiga chin Maria Zosepe e l'at pessighida in tantas maneras causendeli dispiagheres e currutos chi l'an brivada de poter cantare comente issa diat aer cherfidu. Custu est su tema de parizzas undighinas umbe si ladit s'arrennegu po una vena bundante a sa cale no at apidu sa possibilidade de dare isfogu.