Cantadores de Torpè__________________Rimundu Manca

TRES OTAVAS

Ses bella, ses simpatica e modesta,
graziosa, gentile e atraente,
justa, curreta, seria e onesta,
amabile, amorosa, sapiente,
armoniosa cale dea Vesta,
istella luminosa 'e s'oriente,
de Deus incomparabile istrutura,
ses delizia de 'ogni criadura.

 

Narali puru chi so depidore
de infinitos ringraziamentos
e si apo mancadu pro errore
in su tratare e in cumportamentos
Issa ch'est fata totu de amore
perdonet cun sos raros sentimentos.
Ja ch'est Deus chi pagat a usura
cun pesus justu e justa misura.

 

Girat in bidda cuntent'e festosa
dend'ojadas furtivas a dogn'ala,
in faeddos e modos nd'est estrosa
faghende a gustos suos pompa e gala,
si calcunu la leat pro isposa
passat sa vida cun sa rughe a pala,
in penas, in afannos e fastizos,
a dolu sou, de maridu e fizos.