Cantadores de Torpè_____________________________Luca Doddo

GHIRENDE A SU FRONTE DAE SA CUNVALISSENZA
SALUDENDESI DAE TORPÈ

Bastat chi mi dispedo nende adios
e a nos bider sanos in Torpè,
cantu prus prestu partan sos navios
garrigos de soldados in congè,
prego pro totu, comente pro me
chi torren sanos sos chi sono vios
e i sos chi che sono sepultados
chi sian in su chelu collocados.

A SU TIU LIBERADU PALA

Caru tiu bos amo dae s'internu
de su coro, cant'isto in custa vida,
ma paret chi sa mea dispidida
a nos bider det essere a s'eternu,
a bi torrare a su tempus modernu
mi paret chi pro me s'est definida,
ca a torrare a Sardigna atera 'orta
nde tenzo s'isperanzia mesu morta.

A SA MUZERE

M'iscries chi in sonniu t'as bidu
sa Reina de sos Anghelos Signora,
da chi cussa promissa li as cumpridu
bi la potes benighere a donz'ora,
ca Issa nd'est sa mama protetora
chi salvat donzi fizu chi est naschidu
e ch'at a mie puru liberadu
da mesus sos atacos afungadu.

UNA OTAVA IMPROVISADA IN RISPOSTA A SU POETA BUDRONE.

O Budroni ti soles isforzare
pro ponneres a Lucheddu in aterru.
Cando tue a Lucheddu as aterrare
sos anghelos si fuen in s'inferru
e dae monte Nieddu a Taulare
b'an a costruere unu ponte 'e ferru,
cand'as a passizare in cussu ponte
tand'a Lucheddu li paras su fronte.