Cantadores de Torpè_____________________________Luca Doddo

FERIDU IN GHERRA SI FATEIT FOTOGRAFARE E MANDEIT SA FOTOGRAFIA A SU TIU LIBERADU PALA ACUMPANZADA DAE CUSTAS OTAVAS:

Eco sa mea trista cumparenzia
chi an fatu a pustis de feridu,
da ch'in pessone no mi ch'azis bidu
bos mando in cartolina sa presenzia,
pro eterna memoria a s'erenzia
cale ricordu in su coro imprimidu,
L'apo fatu pro vida e pro sa morte
chi non sucedat peus mala sorte.

A s'afligida Trento bos mirade
a Trieste, a Pola, Fiume e Zara,
de su mare Adriaticu unda amara
'ogn'odiu in amore cambiade,
'ogn'omine bos siat unu frade,
'ogni femina sorre o prenda cara,
ca semus de tot'una raighina:
rampu de Roma e de razza latina.

Ponzende fine a sos versos creide
chi ancora de narrere apo idea,
però pro como a mie cumpatide
si non prosigo custa musa mea,
bois sa vida 'ostra prosighide
chin cuntentesa e recrea recrea,
senza tenner molestia peruna
chin vida longa e chin bona fortuna.

Inumbe colat un'eroe sardu
rejone o non rejone si dat logu,
non timet nie, ne abba e ne fogu,
andat fieru senza riguardu,
su corazu l'ispinghet a s'azardu,
su gherrare li est disaogu,
e no l'importat si morit gherrende
ca su sacru diritu est difendende.