Cantadores de Torpè____________________________Carulinu Nonnis

Carlo Nonnis fit naschidu in Torpè su 15 de sant'andria de su 1897 e nd'est mortu in Torpè su 26 de nadale de su 1969. In su 1923 at leadu su Diploma de Licenza Tecnica in Tatari. In sa gherra 1915/18 est istadu feridu prus de una 'olta meritende sa decorazione e sa pensione de gherra chi at rifiutadu. Segretariu politigu in s'opeca de su fascismu, s'ultimu trivagliu sou est 'istadu cussu de ufiziale esatoriale, trivagliu po su cale depiat zirare in brizzichetta o a pè totu sas fraziones de Torpè e de Pasada.
Fizu de unu mastru 'e linna aiat contivizadu cuss'arte e galu como si poten ammirare sos bellos mobbiles ch'aiat fatu po domo sua. At postu poesias meda, cantones de amore po s'isposa e brullas in versos comente si usaiat in cussos tempos. No at lassadu cuadernos iscritos, de s'opera sua nos sono abbarradas pagas cosas detadas a sa fiza Idola cando fit zovanedda e una cantone dedicada a sa muzere chi issa etotu at iscritu, comente sil'ammentaiat, una paja 'e meses innantis de morrere.