Cantadores de Torpè______________________Antoni Maria Pala


 

GOSOS DE SANTU TORPÈ

Cando sa pregadoria
faghides a s'Eternu Re
pro nois Santu Torpè
implorade lughe e ghia.

Salvade sos pecadores
dae s'infernale pena
chin cudda calma serena
provada in tantos rigores
cando sos persecudores
bos impedian sa via.

Pro nois Santu Torpè
implorade lughe e ghia.

Chin cudda forza potente
de valorosu soldadu
cumbatide su pecadu
chi faghet rea sa zente
pro gosare eternamente
chin Jesus in cumpanzia.

Pro nois Santu Torpè
implorade lughe e ghia.

Su 'ostru corazu forte
d'eroe, martire e santu,
mustradu in tantu piantu
send'afrontende sa morte,
contribuat a sa sorte
chi semus in bramosia.

Pro nois Santu Torpè
implorade lughe e ghia.

De sa 'ostra discendenzia
dignos fizos nos faghide
pro tenner alta sa fide
rassignados chin passenzia
mustrende a s'Onnipotenzia
su coro senza ingannia.

Pro nois Santu Torpè
implorade lughe e ghia.

Cant'azis dadu e sufertu
in brazzos de sos paganos
azis a sos cristianos
s'istrada de Chelu abbertu,
mustrende a donzi inespertu
sa potenzia 'e su Messia.

Pro nois Santu Torpè
implorade lughe e ghia.

Cando s'infame Nerone
bos ponet a provas duras
mancu sas cellas oscuras
bos mudan s'intenzione,
cristianu campione
orgogliu de sa zenia.

Pro nois Santu Torpè
implorade lughe e ghia.
Sende in Pisa umbe naschidu
sezis e ismannitadu,
bos an in sas manos dadu
de unu coro induridu,
su leone inferozzidu
pro vois tremet ebbia.

Pro nois Santu Torpè
implorade lughe e ghia.

Su coro forte non fuet
sende a sa colunna presu
da umbe ch'essides illesu
cando sa colunna ruet,
ch'a Satellicu distruet
chin s'omicida mania.

Pro nois Santu Torpè
implorade lughe e ghia.

Sos ch'ana presenziadu
a su miraculu 'idente
an imediatamente
sa fide 'ostra abrazzadu
pentendesi de su pecadu
suta sa falza eresia.

Pro nois Santu Torpè
implorade lughe e ghia.

Faddidu cussu disignu
de s'ira satellicana
dadu in manos bos ana
de unu peus malignu,
sucessore e fizu dignu
de mundana tirannia.

Pro nois Santu Torpè
implorade lughe e ghia.

Faghide chi tanta pena
martirizu e patimentu
servat pro allentamentu
a donzi nostra cadena,
sa debilesa terrena
rinforzet Jesu e Maria.

Pro nois Santu Torpè
implorade lughe e ghia.

Cando sa pregadoria
faghides a s'Eternu Re
pro nois Santu Torpè
implorade lughe e ghia.