Cantadores de Torpè______________________Antoni Maria Pala

 

UNU CONSIZU
(otava serrada)

Custu solu t'averto pro continu
si cheres viver omine educadu:
chi non ti lees su vissiu 'e su 'inu,
ca si lu vies male misuradu
diventas tue e totu un'assassinu
de sas virtudes chi Deus t'at dadu,
senza contare chi si faghes fizos
ti naschin chin sos propios fastizos.

Si 'enis a su 'inu avissiadu
tue e totu su samben t'avelenas
ca pro vier su 'inu a tassas prenas
parizzos si an sas dies chirzinadu
ei sos fizos chi an ingeneradu
jughene samben malu intro sas venas
e sono bios chin dispiaghere
vitimas de s'alcolicu podere.

Custu solu t'averto e racumando
pro cantu duras biu tinde ammenta,
prite su 'inu, si non como tando,
ti lassat indelebile un'imprenta
e sinde at bidu dae cando in cando
restare chin sa vida mes'ispenta,
e tando tropu a tardu sinde abbizan
ch'issos e totu si demoralizan.