Cantadores de Torpè________________________Austinu Satta

NORMA
(otava serrada)

Gentile e graziosa signorina,
ch'a mie coro e mente azis furadu,
comare Norma in sa 'idda Torpina
Venere sa bellesa bos at dadu.
Minerva maestosa che reina
sa prudenzia a bois at donadu,.
Oje compare 'ostru si bos cantat
ca sezis sa prus bella e sinde 'antat.

No ap'in vista algunu paragone
alcuna dea 'e bos assimizare,
bella Diana e ancora Junone
chi solin in su chelu triunfare,
si bos bideren Teti chin Didone
no an corazu de bos faeddare,
sas bator deas cambian colore
ca sono de bellesa inferiore.

Cale dea o ninfa incantadora
chi solit in s'Olimpu triunfare
bois sezis sa dea triunfadora,
su coro m'azis devidu furare
ca at invidia finas s'aurora
bellesa pelegrina de ammirare,
ca possedis sambene de Ciprigna
comare Norma sa prima 'e Sardigna.

De sa Sardigna e de su Continente
e ancora in sos regnos de oltre mare,
ca si in sos ballos bos biden presente
totu sas manos bos diana dare,
sezis sa dea bella e sabiente,
su dulche modu, su bellu tratare,
totu sas bellas bos faghen corona
comente a Venus in sa lughente zona.

E si unin a bois riverentes
chin massima prudenzia e cortesia,
imperatrices de regnos potentes
bidende a bois tenen gelosia,
cantende chin sas musas divertentes
Apollo deus de sa poesia
e tastende sa lira apolliana
cantende a bois che dea galana.

Bid'a Urania chin su violinu
Calliope sonende sa ghiterra
e intonende unu cantu divinu
pro festeggiare custa dea in terra
e Apollo bos istat a vicinu
ma si tocan a bois faghen gherra,
custu deus est cantu de alloro
cantende a bois chin divinu coro.

Bessin dae sas musas d'Elicona
cuddas abbas divinas prus famosas
bessit Minerva chin d'una corona
cinta d'olia e da candidas rosas,
custa corona Minerva bos donat,
chin sas fozas d'olia preziosas,
cando sas musas sono armonizende
Minerva sa corona bos est dende.

Minerva sorridente e maestosa
lis narat a sas musas in presenzia:
fia sa dea de sa sapienzia
ma Norma Canu est sa prus virtuosa,
Venus bella l'at dadu s'assistenzia
A sa dea de amare prus famosa
Deas e musas nonde onoramus
Nois divinamente l'adoramus.
Sas deas bos an dadu donu e bantu,
Apollo chin sas musas si cuntentat
pruite sezis sa dea de incantu
e de cantare a bois sinde ammentat,
custu coro a bois amat tantu,
colpidu dae Cupidu si presentat,
ca sena vois non potet 'istare
pruite sezis digna 'e bos amare.

Cale poeta o artista sovranu
chi possedit talentu e fantasia,
Rafaellu chin su pinzellu in manu
cando sas madonninas pintaiat,
su famosu Virgiliu mantovanu
sas ancellas d'Enea cantaiat
e si cussos in vida fin 'istados
totu pro vois si fin dedicados.

Non bi leo ne gustu e ne ispannu
semper pessende in sa dea ch'adoro,
donzi minutu mi paret un'annu
ca penante d'amore est custu coro
preghende note e die a Babbu Mannu
de mi lassare su castu tesoro.
Custu tesoro a lu tenner in manu
A lu godire chin salude e sanu.

Custu tesoro non lu lasso mai
pro cantu sinde ponzat in impignu
chie lu tocat est unu guai
ca l'amo chin afetu e chin carignu,
sa forza de s'amore est forte assai
si Cupidu m'azuat e so dignu,
custu tesoro l'istimo e l'aprezzo,
lu amo, lu adoro e lu carezzo.
Non b'at cosa in su mundu agualabbile
chi potat superare cust'amante,
pro bois so costante e so amabile
de veru coro e apassionante,
diva casta e gentile e ammirabbile,
sa dea maestosa triunfante
e imploro sa sorte e su destinu
eternamente a bos esser vicinu.

Però non creo e non bi so pessende
chi nissunu m'isfidet in s'amore
pro bois mi at eletu su Signore
e chin s'ispera sua so vivende
de benner paladinu triunfadore
binchidore in sa giostra cumbatende
pro 'alanzare a bois amada mea
binco sa giostra e restades mea.

Cando jeo bos apo acuistadu,
minde poto 'antare veramente,
cavaglieri in su mundu fortunadu
in su tempus presente e veniente
ca so pro bois apassionadu
custu coro d'amore est suferente
pensade de isolvere sas cadenas
pro calmare a s'amante custas penas.

Non mi lassedas solu in agonia,
comente moribbundu suspirende,
pensade chi sa vida est una ebbia
e dopo morte s'anima est penende,
nde paret male finas a Maria
pro custa dea s'anima est sufrende,
e prima de suceder tale errore
salva su moribbundu pro s'amore.

S'anima in terra pro fine amorosa,
si non lu salvat benit sepultadu,
sa paraula amore est dulche cosa
lu potet narrer chie l'at proadu,
s'anima in cuddu mundu est dolorosa
semper pessende pro chie at amadu,
pruite no at tentu sos disizos
s'anima pro s'amore est in fastizos.

Chie cumprendet podet osservare,
babbos, mamas, parentes e amigos.
Babbos e mamas tenen sos obrigos
fizos e fizas a los educare,
però sos fizos deven cojuare
a gustu insoro sena aer castigos,
custu faeddu meu no est nou
'ognunu cojuare a gustu sou.

Cando s'amore naschit dae coro
e d'una mente intelletuale,
pro cantu est preziosu su tesoro
pius bellu est s'amore naturale,
Salomone monarca orientale
L'at nadu a Saba t'istimo e t'adoro,
m'at fatu sapiente su Signore
ma custa 'olta manco pro s'amore.

Dea, m'azis cumpresu finalmente
su lamentu, su 'antu pro s'amore
si bos apo cantadu dignamente
su 'antu meritades senza errore.
Su coro, s'intelletu ei sa mente
an trivagliadu e an tentu s'onore
e nd'est custa cantone in limba mea
pro Norma Canu, sa nobbile dea.