Cantadores de Torpè________________________Pepinu Coronas



MUTOS

Unu palatu artisticu e bellu
son fraighende a nou in sa Gaddura
duos ebreos de altu cunsizu
chin pedras jutas dae Monte Rosa
chin marmaru de Massa e Lombardia,
chin abbas de su Nilu e de Tamigi
chin alabastru de s'Iglesiente
e chin antigu doricu metallu.

Unu palatu artisticu e bellu
Si girere s'Ispagna e Portugallu,
chin sa terra Britanna, s'oriente,
s'Italia tota, Berlinu e Parigi,
s'elegante Vienna, s'Ungheria,
che a tie Columba deliziosa
non nde dia aciapare s'assimizu
ca ses una magnifica pintura
de Giotto, De Vinci, Rafaellu.


Nara it'est amore anim'amante
anim'amante nara it'est amore
it'est amore anim'amante nara

Nara it'est amore anim'amante
Jeo creo chi siat su chi cara
rendet sa vida in donzi dolore
ca de issu nd'est s'unicu calmante.


Sos pastores de Bitti
falan a Campidanu
chin sas gamas insoro.

Sos pastores de Bitti
Aceta prenda d'oro
de t'astringher sa manu
Venus bella permiti.


Unu pintore insignu
b'at bennidu a Nuoro
pro 'istaret inie
ca li faghen pintare
sos costumen ch'at bidu
intro de duas salas
e de pustis sa luna.
su mare chin sas costas,
unu Re senza fizu
pianghende in sa tumba.

Unu pintore insignu
Tue ses che Columba
bianca prus che lizu
chin pinnas bene postas
non tinde fartat una
fortes jughes sas alas
in altu as su nidu
non ti poden tocare
ca pro ciapare a tie
b'at un'iscala d'oro
chi b'alzat chie est dignu.


Rafaellu chin Dante
Colombo e Galileu
sono astros potentes
ch'illuminan s'istoria
de lughe portentosa.

Rafaellu chin Dante
Zovana virtudosa
dadu t'aian gloria
si esseren viventes
Pindaru chin Alceu
Prassitele e Timante.


David, Rachele, Abramo
los at pintos in Bosa
su professor Derios.

David, Rachele, Abramo
Bazi suspiros mios
bazi e nade a Donosa
ch'immensamente l'amo.


Sa Santa de Siena
est grande italiana
la pinghet in Nuoro
unu pizzinnu ebreu.

Sa Santa de Siena
Signore Deus meu
m'an trafitu su coro
chi est chi mi lu sanat
si tue non nde as pena?


Chin tres de 'Uddusò
dottor Pala partidu
est 'eris a Nuoro.

Chin tres de 'Uddusò
Cantu bellu est su coro
chi sinzeru e lughidu
nat su sì o su no.


Su costumen d'inoghe
in martu e in abrile
nanchi l'an presentadu
a su Re in Verona.

Su costumen d'inoghe
A lavadora 'ona
mai preda at mancadu,
a su massaju vile
donzi zapu li noghet.


Coronadu de gloria
de sas prus luminosas
su Generale Francu
benzat a s'annu nou
in s'Italia bella.

Coronadu de gloria
Altissima donzella
su sembiante tou
cheret postu a fiancu
de sas pius donosas
chi registrat s'istoria.


In dulche sardu litu
pitorescu est Nuoro
a pes de s'Ortobene.

In dulche sardu litu
tenzedas salude e bene
paghe, amore e decoro
e meritu infinitu.


Note bella de austu
sas undighi non dromo
s'intenden in carrera
cantos bellos d'amore
d'onestos e donosos
zovanos de 'idda mia.

Note bella de austu
Comente a Tobia
faghidebos isposos
chin femina d'onore
massaja verdadera
su pensarebi como
est bellu, santu e justu.



Dae Torpè a Luras
dottor Ruju est partidu
ca nanchi est arrivada
sa nostra imperatrice.

Dae Torpè a Luras
Onesta e preziada
mi pares Beatrice
sa chi Dante at bidu
in Celestes luguras.


Oje pinto a Mosè
Dante chin Beatrice,
Elena s'ispartana,
Pomponia Grecina.

Oje pinto a Mosè
Gentile signorina
ottimamente sana
cuntenta e felice
torret prestu a Torpè.


Su costumen famadu
de Osilo at pintu
Ciusa in Nuoro
e Floris in Gallura
de pinghere at decisu
a don Bainzu Pes
poeta genuinu
che Limbori e Limbudu.

Su costumen famadu
Giovanu libertinu
t'alimentas de ludu,
non pensas su chi ses
chin su vigliacu risu
cres ponner in bassura
sos chi paschen d'oro
sos chi meda distintu
tenen su sambenadu.



Una tiniscolesa
jughet curitu nou
ca nanchi isposat como.

Una tiniscolesa
Sa mere 'e custa domo
a gustu e bramu sou
la 'idemas marchesa.


Feminas de Tonara
giran peri Sardigna
sos turrones bendende
de nughe e de nunzola.

Feminas de Tonara
In s'istanzia sola
cando t'ido cosende
modesta e benigna
ti assimizo a Sara.


In s'adde fiorida
cantat sa pastorella
cuddu mutu chi nada:
"su puzoneddu d'oro
ch'in gabbia tenia
partidu nd'est lontanu
a terras furisteras".

In s'adde fiorida
Paraulas sinzeras
sena mai arcanu
dami solu ebbia
dimustrami su coro
o bellissima fada
o Clori tantu bella
palma d'oro dechida.


Sas fadas d'Ennargentu
tucan in carru d'oro
a sos amenos litos
de su sacru Ortobene
ca den tessere inie
pro sas pizzinnas bellas
chi Torpè dat isposas
Su pannu: s'Onestade
Su brocadu: s'Onore
Sa seda: s'Alta Fama.

Sas fadas d'Ennargentu
Nobilissima dama
s'unica chi s'amore
jameit "Majestade"
sas olezzantes rosas
sas fulgentes istellas
riverin solu a tie,
tue de raru bene,
teneros, infinitos
palpitos a su coro
mi das e de cuntentu.


Unu tempus sa Corte
de s'antiga Pasada
solian visitare
Teodato e Valente
chi fin ducas famosos.

Unu tempus sa Corte
Amabbiles isposas
bos jugan dignamente
felices a s'altare
de sa data bramada
prestu nd'apedas sorte.



Ajò prestu ischida
pesa Eleonora
a tantu mannu male
pro cust'Isula tua
fortemente t'impigna.

Ajò prestu ischida
Non rinaschit Sardigna
sende sa menzus sua
zoventude galu fora,
cal'est su corpus, cale
chi senz'anima at vida?


Clorinda e Berenice
Orazio e Tigellu
in Roma son pintende
artistas de Turchia.

Clorinda e Berenice
Naschidu est su Messia
in Chelu son cantende
su bambineddu bellu
o Betelem felice.


Su nobile Musio
est partidu a Gallura
chin d'unu padre dotu
professore in Torinu.

Su nobile Musio
Prosighemas continu
contr'a Satana totu
senza manza 'e paura
sos soldados de Pio.



Rosa e rosignolu
non si poden cuare
ca su bellu profumu
chin s'armonicu cantu
los traighet continu.

Rosa e rosignolu
Narat santu Austinu
chi sa vida est piantu
e donzi bene est fumu
si non pensas chircare
de Cristos su consolu.


A bidda Padre Luca
beniat donzi jerru
su poeta 'e Patada.

A bidda Padre Luca
Anima isventurada
framaridas d'inferru
t'essin solu da 'uca.


Maria ses s'istella,
Maria ses sa nae,
Maria ses su portu.

Maria ses s'istella
Donz'anima at cunfortu
de su Chelu ses jae
o pura Verginella.


Maria ses ispada
palma vitoriosa
istendardu e corona

Maria ses ispada
Virgine tantu 'ona
cust'anima afannosa
pro Te siat salvada.



Viola 'e pensieru
mi pranto in su jardinu
chin ateros fiores
de suave profumu
de vagu coloridu.

Viola 'e pensieru
Non ponzas in olvidu
chi richesa est fumu
est fumu sos onores
si chin Cristos continu
non ti tenes sinzeru.


Sa mama 'e sa reina
si narat Milena
e i su babbu Nigola.

Sa mama 'e sa reina
O Virgine consola
in tanta cruda pena
cust'anima mischina.


Pastores de Limbara
partin a s'Inghilterra
in su mese 'e austu.

Pastores de Limbara
S'omine bonu e justu
det bincher cada gherra
sa prus cruda e amara.


Din, don, dan,
sonat sa campanedda
cando tocan s'iscola

Din, don, dan,
O Virgine consola
custa trista orfanedda
chei s'isposa 'e Can.



Numen d'eterna dura
de altissima gloria
"principe Amedeo"
chi in Africa nd'est mortu.

Numen d'eterna dura
Su Signore risortu
comente bramo eo
semper bos det vitoria
paghe, paghe e dulcura.


Antonia Mesina
ite 'antu, ite gloria
pro sos sardos de Pio.

Antonia Mesina
In su coro m'iscrio
"morrer sì ma vittoria
che i sa barbaricina".


De preziosas sedas
chi usan sas Torpinas
est costumene insoro.

De preziosas sedas
Cussenzias meschinas
non lu brutades s'oro
pro chi tantu gherredas.


Bellos pregios tantos
nos dat sa puridade
in cust'adde afannosa.

Bellos pregios tantos
Oh, cantu s'umiltade
virtude est preziosa
issa faghet sos santos.


In dun'adde apo 'idu
de Persia sas fadas
ricamende a oro,
a seda e arghentu
unu mantu de grana
d'orientale usu.

In dun'adde apo 'idu
Pius de chentu ispadas
in coro mi an fichidu.

De Persia sas fadas
In coro mi an fichidu
pius de chentu ispadas.

Ricamende a oro
Pius de chentu ispadas
fichidu m'an in coro.

A seda e arghentu
Fichidu m'an in coro
ispadas prus de chentu.

Unu mantu de grana
Ispadas prus de chentu
fichidu in coro m'ana.

D'orientale usu
Fichidu in coro m'ana
de chentu ispadas prusu.


Perfugas e Ploaghe
Zaramonte e Laerru
sono 'iddas de Anglona.

Perfugas e Ploaghe
Cumbinchemas s'inferru
chin d'una vida 'ona
de amore e de paghe.