Cantadores de Torpè________________________Pepinu Coronas


 COSTA ERMOSA
(sonete)


Costa Ermosa, rica sì d'istoria,
de vetustos ammentos adornada,
chin magnificos versos celebrada
dae poetas che Farsiliu e Inoria.

A probe de su colle ue Posada
galu s'onorat de s'antiga gloria...
dae Tolomeo, si at memoria
chi fit Feronia illustre situada.

Sardos e istranzos totu ajone
a bos deliziare peri custos
mirabbiles, preclaros, almos sitos,

laudes a dare chin rejone
a s'autore de 'asi venustos
cuadros de natura e infinitos,

cantarel'innos de benissione
chin versos santos adatos e justos
comente veramente nde at meritos.

PRO SA ZOVENTURA
(sonete)


Eco como su tempus de amare
zovanu de vint'annos crèe a mie
eco como su tempus de pensare
a s'eleta Rachele chi unu die

orgogliosu des jughere a s'altare
dechida rosa, candida che nie,
eleta totalmente a profumare
su caminu 'e sa vida solu a tie.

Zovanu onestu chi pares beranu
cun totu sas dulcuras e fiores
de Deus su cunsizu invoca tantu

pro chi a tie cunzedat intantu
femina 'ona de altos onores
digna d'amore immensu e sovrumanu.