PREGADORIA PRO SOS EMIGRADOS
(sonete)

In s'altare mi so imbenujadu
su note de Nadale chin amore
preghendebilu forte a su Signore
torren a domo sos chi an emigradu.

Viver donzunu trancuillizadu
senza tenner fastizu e ne dolore
ca sa zente est perdende 'ogni fiore
sos frutos chi in su coro ana portadu.

Cantas mamas bi at in bonu tratu
'ogni die, 'ogn'ora, 'ogni minutu
ch'istan pensende a sos lontanos fizos.

Viven chin dolu tantu e a fastizos
a suspiros de coro e a sucutu
pranghende e mirende su ritratu.

A SA MUZERE
(otava serrada)

Muzere mea est bona a ricamare
e non timet trivagliu e ne fadiga
faghende su custumen a s'antiga
pro cando 'enit su carrasegare
in custumene poten isposare
chi est su menzus passu in sorte amiga
e s'andat puru a calchi cavalcada
chin sa camisa bene ricamada.

Muzere mea est unu campione
chi la poto chin totus presumire
ischit sestare, ifirzire e cusire
su cassu grogu, justigliu e zipone
sa 'unnedda chin brocadu e listrone
tot'a s'antiga potides ischire
cusida a filos d'oro, seda e lana
pro cojuadas e pro donzi 'ajana.