Cantadores de Torpè________________________Nicolinu Tarquini

 

PAULINU
(cuartina)

Muzere
Narami Paulinu
umbe che fis zirende
ca ti fia chirchende
e non bi fisi!

Maridu
A sa 'e Migliorisi
so andadu
si teniat trinciadu
pro fumare.

Muzere
S'iscusa 'e mi 'ogare
la tenes semper pronta
mancari sia tonta
no mi coglionas tue!

Maridu
Si como como incue
fimus arrejonende
lu fia dimandende
si teniat tabbacu...

Muzere
Ses ignorante e macu
semper chin s'ingannia
ti cres chi no l'ischia
a umbe abbitas.

Maridu
Chi siazis malaitas
dae Deu
ja m'as postu in anneu
sa 'ennida a Torpè.

Muzere
Sincasu est dae te
si t'an tratadu male
peus de animale
so tratada.

Maridu
Tue ses fariada
peus de una maca
ma t'apo a ponner taca
calchi die.

Muzere
Si no lassas a mie
ti ponzo crabisteddu
b'est babbu e Caraleddu
chi t'aconzan su pesu.

Maridu
Ma eo mich'ando atesu
chi non t'ida piusu
e dae como in susu
fato a su diferente.

Muzere
Su narrer de sa zente
lu ses boghende tue
abbitende a incue,
rimitanu!

Maridu
Si ti beto sa manu
t'ammento su passadu
sa surra chi m'at dadu
frade tou.


Muzere
Semper ses dae nou
creschendemi sa pena
chin custa cantilena
Paolinu.

Maridu
Sa zente de su 'ighinu
ti son abbindulende
ca m'an bidu passende
in s'istradone.

Muzere
Nono ch'est sa rejone
su chi narat sa zente
ca t'iden frecuente
zirende a chirr'a susu.

Maridu
Dae oe piusu
torro a passare incue
bastes chi finas tue
custa limba isfrenada.


Muzere
Jeo m'isto cagliada
e ritirada in domo
bastes chi dae como
no istes minazzende.

Maridu
Ma eo tilu so nende
e lu ripito ancora
chi mai ammor'ammora
so andadu.

Muzere
Ma a mie m'an contadu
sa zente chi t'at bidu
ca che fis costoidu
in cussa domo.

Maridu
Chi m'idas mortu como
cantu eo bi passo
anzis si poto iscasso
su caminu.

Muzere
Medas de su 'ighinu
l'ana contadu a mie
chi finas cudda die
nanchi fizis basende
narami Paulinu
umbe che fis zirende!