Cantadores de Torpè________________________Nicolinu Tarquini
SOFIETO E TUNTUNNIU
Posta paris chin Antoni Maria Pala, un'otava per omine.
(otava serrada)
Sofieto una die abbinazzadu
li narait de gai a Tuntunniu
"sa gana de ti cherrer cojuadu
ti ch'est intrada tropu primidiu
ma de parizzas chi nd'as domandadu
ti lassan currer che pische in su riu
pagu chircadu in d'unu letu vastu
comente zovaneddu 'e pagu imprastu".Tuntunniu rispondet a dovere
arrabbiadu e a bavula in buca
nende "tue as brincadu sa carruca
e ses ancora a zapare muzere
ca nissunu t'aiat piaghere
faghias: dimandadu e dadu zuca;
non nde chirches batia e ne bajana
ca tantu prus de zuca non ti dana".Sofieto pighendeche a sa nue
si pesa rizzu dae sa cadrea
nende "sas zucas mannas las as tue
sa 'ennida ch'as fatu a bidda mea
ca non bind'amus ne bella, ne fea,
ne pizzoca, ne bezza a pesa rue,
costazi cota che figu in istiu,
chi si cherfat leare a Tuntunniu".Tuntunniu li faghet una fica
longa cantu una coa 'e cassarola
e li narat "de zuca in 'ogni iscola
tind'as buscadu una provista rica,
zuca nachi t'at dadu Murritola
e zuca puru a tie an dadu in crica
Conch'e isporta chin Car'e padedda
Punzuda chin Sannita e Manchitedda".
"Lass'istare padeddas e isportas
de Punzuda e in crica santuaria
ca tenes zucas de s'iscola agraria
in totu sos cozolos chi ti 'ortas,
ello non til'ammentas de Malaria
cando tich'at cazzadu bator bortas,
insumma a tilas cogher no as padedda
sas zucas de Sannita e Manchitedda"."E tando como lu fato a dispetu
e minde chirco una bella bella
ca si m'ingranit su trigu 'e s'innetu
la campo mama e fiza marturella,
ca si chelzo cojare so a tretu
pro chi jugat in fatu sa 'itella,
in duos cartos si non b'at istrinta
in Sa Marmara ocannu bessit trinta"."Lass'istare sos trintas e barantas
in cussa terra de pabaranzolu,
trigu 'onu bind'apo in Ferrazzolu
chi si colas inie tind'ispantas
ch'in cussa mata noa chi ti 'antas
non bi 'essit su pane pro te solu
ca chie at bidu e bi connoschet trigu
nanchi b'essit tres lados e azigu"."Ma eo no ap'isetu in trigu ebbia,
oramai sos contos suni fatos,
ca si 'endo su ch'apo in bidda mia
m'acumodo de domos e palatos,
de letu 'onu e de biancheria,
de bancas, de cadreas e piatos,
ma si t'isposas tue pro fortuna
la jughes a s'albergo de sa luna".Jeo si mi cheglieren tenzo intradas
prus chi non tue poveru mandrone,
ca chin sas funes ei su furcone
sos tontorrones mi campan debbadas,
e poi tenzo tres partes pagadas
de sa domo chi amus a cumone,
senza contare su chi tenzo a cua
chi superat su ch'as in bidda tua"."Bastes sa cantilena finichela
ca como che so bell'e a cucurru
non siat chi sa lara chin su murru
ti fata rujas che fram'e candela,
ist'a biere a mata de tamburru
chi non trazes su ludu 'e sa carrera
ca si manu ti ampilo de botu
non ti connosches mancu tue e totu"."Non diat esser s'arga 'e Tuntunniu
chi dait punzu a cara a Sofieto,
omine che a tie si m'apreto
ti fago currer che pische in su riu
o ti fago che cantu 'e tatalliu
s'abberu abberu in totu m'inchieto
e si non finis chin custos murrunzos
'isto pagu a ti dare duos punzos"."Punzos no minde dais ca non bales
mancari l'apas in s'intenzione
emmo ch'est a zirare in bidatone
o in fatu sos rios e canales
fatende senza contu sos penales
pro chi sias passende in s'istradone,
ma si brullas chin megus Sofieto
tiche fato sas laras che soneto"."Tando si tila sentis como e totu
ti fago 'idere a Jagu Lampende
istadi mudu ca tilu so dende
leadi dae me custu cazzotu,
istade firmos chin cuss'abbolotu
ca ndeli so un'ateru aporrende,
istade firmos no mi mantenzedas
ca custu sero chende goglit medas"."Si tando de mazare tenes gana
la provamus sa forza Sofieto
ca si t'addobbo eo unu direto
ap'a parrer papende una banana,
a su punzu t'ischerfio che rana
si abberu abberu eo m'inchieto,
ca ti bastat chin duos punzos solu
pro ti fagher sa cara che majolu"."Tando si pones mente la finimus
e terminamus custa chistione,
sas zucas las ponimus a cumone
e si amus ispazzu las bendimus,
de custas zucas ite nde faghimus
tenzendelas debbadas a muntone,
s'amus ispazzu las bendimus como
ca non bind'istat ateras in domo".