RICONNOSCHENZIAS PRO BABBU E PRO MAMA
(sonete)

Babbu e mama bos amo e adoro
comente amo e adoro a Deu
ca penso chi in totu s'esser meu
b'est de vois s'amore, anima e coro.

E d'esser fizu 'ostru minde onoro
ca m'azis dadu in vida 'ogni recreu,
pro me balides unu mundu intreu,
in bois bido su menzus tesoro.

E non bramo cos'atera peruna
che de aer a bois babbu e mama
ca m'azis dadu forza, briu e ghia.

Prego pro vois sa menzus fortuna
de poterezis lograre 'ogni brama
chin salude, benessere e allegria.

A MAMA MEA SUFERENTE
(sonete)

Mama! a bos biderepo suferente
rimediu chirchende a tantu male,
andende da un'a s'ateru ispidale
pro poter aer cura sufiziente,

a mie at ratristadu coro e mente
chin d'unu turbamentu generale,
a Deus cale Babbu Universale
pro vois prego frecuentemente.

Chi bos torret perfeta sa salude
chin tantu briu, forza e vigore,
comente in prosperosa zoventude,

prite so galu pizzinnu minore,
bois chin tanta nobile virtude
sezis pro me s'amparu prus mazore.