Cantadores de Torpè________________________Metodio Dalu

T'ISTIMO E SUFRO DONZ'ORA
(sestina)

T'istimo e sufro donz'ora
ca bramo s'amore puru,
però non so siguru
chi tue m'ames ancora.

Sos ojos pianghende
forman una funtana
ca tue ses istrana
o mi ses traighende
e su chi so pensende
no! no est cosa arcana.

T'istimo e sufro donz'ora
ca bramo s'amore puru,
però non so siguru
chi tue m'ames ancora.

In donzi istelu 'e frore
in sa foza noella
su numen tou Mirella
iscrio, caru amore,
ca t'amo chin ardore
o lugorosa istella.

T'istimo e sufro donz'ora
ca bramo s'amore puru,
però non so siguru
chi tue m'ames ancora.

S'Esser tou donosu
mi faghet dilliriare,
in su tantu pensare
mai non tenzo gosu,
a s'ora 'e su reposu
mi faghes sonniare.

T'istimo e sufro donz'ora
ca bramo s'amore puru,
però non so siguru
chi tue m'ames ancora.