Cantadores de Torpè________________________Salvadore Craba Mattiu

 

A UNU FAULARZU
(otava serrada)

Mi faghes pena cando tue apeddas
coment'e canes mustrende sas sannas,
ma da chi solu 'e faulas faeddas
cres chi sas pessones las ingannas
si fin 'istadas nessi minoreddas,
ma tue las racontas tropu mannas
ca est cussu su tou unicu donu
tantu atera cosa non ses bonu.

Pro te su justu istadu est sempr'ignotu,
cust'est sa veridade sena nue,
bonos e malos bind'at in totue
ca da tempus antigu si est connotu,
ma pro essere faulagliu tue
cres chi faulaglios sian totu
ca solu tue faulas cuncedis
tantu atera cosa non possedis.

Proite menzus non ti orizontas
cun sas pessones justas e ispertas
chi jughen sas orijas sempr'abbertas
ma no ascurtan paraulas tontas
e cando tue faulas racontas
sas faulas ti 'enin iscobertas
ca sa figura de su faulagliu
est pudida che arga 'e muntonagliu.

Non m'importat de su chi tue as fatu
ma ti cunsizo coment'e poeta,
cando ses cun amigos a cuntatu
trata sa veridade justa e neta,
si ti as costruidu una pinneta
mai nerzas chi as unu palatu,
non deves illustrare a totucantos
faulas mannas pro ti dare vantos.

Si faulas racontas pro rejone
de la fagheres franca forsis crese
ma si 'enzeren a su tou paese
e dimandan informazione
nende ite ti naras, chie sese,
si a su postu 'e oro ses carvone,
tando cun cale facia ti presentas
si sun faulas solu sas ch'imbentas.

Atentu a su chi naras s'oju abberi
si as bonu intelletu e sensu sanu,
cando faeddas su justu riferi,
non sias paza sola senza granu
e si as tue un'iscoba in manu
non deves narrer chi ses cassieri,
pensa de onorare sa tua arte
però s'anzena lassa a una parte.

Mai ti deves dare ater'onore
ses ispazzinu e restas ispazzinu
massimu podes esser diretore
de sas iscobas de su magasinu
ca cussas puru bi cheren vicinu
pro mantenner pulidu 'ogni setore
e deves isgombrare da 'ogni perra
finas sas cicas chi ruen a terra.

Si veramente as sensu profundu
aprezza sa rejone e cunsidera,
podes pensare de gente in su mundu
binde bisonzat de 'ogni manera
in cale si siat arte o carriera
ja bi cheret su primu e su segundu
ma si a su dovere non t'inchinas
progetas meda e niente cumbinas.

Solu sa veridade justa crè
ap'eo racontadu sempre a tie,
ma si tempus nde tenes calchi die
send'in vacanza passache a Torpè,
prova inie a domandare 'e me,
si cosa ti apo nadu est totu inie
tantu non so istranzu e ne ignotu,
sos torpeinos mi connoschen totu.

Da chi leges custa poesia
imprimidila bene in sa memoria
che omin'e cussenzia naro ebbia
sena chilcare mai vana gloria
ca si usas sa veridade pia
as in manu sa palma 'e sa vitoria
ch'est donu pius bellu e naturale
chi separat su bene dae su male.