Cantadores de Torpè________________________Salvadore Craba Mattiu



A NOSTRA SIGNORA 'E SOS ANGHELOS
(moda)

Pro su bene comunu ses naschida,
suprema, Santa Vergine sagrada
distinta e subra a totus gloriosa
cun s'isperanzia de s'eterna vida
da martires e santos aclamada
de Deus mama, fiza, eleta isposa.
Peruna istella bi at luminosa,
ne pianetas, ne sole, ne luna,
postas de fronte a s'umana prole,
in paragone a tie mama bella,
luminosa non b'at peruna istella
ne pianetas, ne sole, ne luna,
istella non b'at luminosa peruna,
ne pianetas, ne luna e ne sole,
postas de fronte a s'umana prole
in paragone a tie bella mama.
Ses pro su mundu eterna fiama,
universale, divina lanterna,
ses pro su mundu sa fiama eterna
lanterna divina universale,
neta, sena pecadu originale
a su cuspetu 'e Deus ubbidiente.

Non t'inchinas pro s'aversu serpente
ch'at semenadu sa terra 'e ispinas,
suta su pè sa conca l'as pistadu
ponzende in festa totu s'universu.
Non t'inchinas pro su serpente aversu,
ch'at semenadu sa terra de ispinas,
pro s'aversu serpente non t'inchinas
chi de ispinas sa terra at semenadu,
suta su pè sa conca las pistadu
ponzende in festa s'universu totu,
dae ora sos anghelos an connotu
sa mama luminosa 'e s'empireu.
Pro su bene comunu ses naschida…
…………………………………….
Ubbidiente a su cuspetu 'e Deu.

Salvadu tue l'as su mundu intreu
cando a lughe su Messia as dadu
allontanende un cussa note pia
dae s'isfera terrestre 'ogni nue;
su mundu intreu salvadu l'as tue
cando a lughe su Messia as dadu,
su mundu intreu tue l'as salvadu
cando as dadu a lughe su Messia
allontanende in cussa note pia
'ogni nue da s'isfera terrestre.
Reina bella, sovrana celeste
tutela dogni criatura umana
reina bella celeste sovrana
tutela dogn'umana criatura
chin cussa tua jara lughe pura
illuminadu as s'umanu intelletu.

Pro su bene comunu ses naschida… 
……………………………………
Ubbidiente a Deus su cuspetu.

Ses mama de amore, santu afetu,
pro nos salvare sufridu as e piantu
finas a cando in su Golgota as bidu
mortu in rughe su Cristos Redentore.
Mama ses de afetu, santu amore,
pro nos salvare sufridu as e piantu,
ses mama de afetu , amore santu,
pro nos salvare as piantu e sufridu
finas a cando in su Golgota as bidu
su Cristos Redentore mortu in rughe.
Isse fit sa vida, via e lughe
pro salvare su mundu aflitu e duru
e inue ancora b'at iscuru
dae su chelu bi pensa, Signora,
e inue iscuru b'at ancora
dae su chelu, Signora, bi pensa,
suores e fadigas cumpensa
cun grassias perennes e favores,
cumpensa sas fadigas e suores
in favores e grassias perennes.

Sos emigrados, dae males indennes,
prestu de che torrare 'enzat sa die,
custu, Vergine Santa, prego a tie
guida e protetora nostra ses,
'enzan unidos a sos tuos pes
a adorare su tou numen sacru
de fronte a su dignu simulacru
coronadu de anghelos divinos.
A torpeinas e a torpeinos
nde los salves de pena e afannos
campen de vida terrena chent'annos
cun allegria, prosperos e sanos,
illumina de amore 'ogni cussenzia
su mannu comente a su minore.
Sas onestas bajanas e bajanos
Benzana totu a sa tua presenzia
Pro coronare su sognu de amore.
'ogni essere vivente, pecadore,
umiliadu si pentat Maria.
Totu sos males los potas curare,
de cale siat tipu 'e malvagìa,
cando ti solen sinceros pregare
los guides ancora in 'ogni via,
in s'aera, in sa terra e in su mare,
semper fideles a sa tua clemenza
pro connoscher s'eterna permanenzia.