Cantadores de Torpè________________________Bustianu Pilosu

 

BUSTIANU PILOSU

Est unu de sos duos curadores de custu libru. Est naschidu in Torpè su 3 de austu de su 1958 e nd'est mastru in sas iscolas superiores de chimica e de elettrotecnica. Est nebode de s'ateru Bustianu Pilosu presente in custu libru chi fit su manneddu e po su cale est istadu pesadu. Apassionadu de sa cultura sarda at cuminzadu a iscriere cantones in sardu logudoresu e in gadduresu dae s'edade de degheot'annos partecipende finzas a cuncursos de poesia sarda in diversas ocasiones. Est istadu premiadu chin su sigundu premiu in Biddanoa 'e Tulu "Premiu de Poesia Sarda Benvenuto Lobina" po sa poesia in gadduresu "Emigranti"; duas boltas in Otieri "Premio Città di Ozieri" umbe at leadu una 'olta sa Menzione D'onore in sa sezione Poesia chin "Ventu" semper in gadduresu e in su 1997 su Premio Speciale della Giuria in sa sezione Tra Poesia e Canto po sa poesia "Anninnia (a Elene fiza)" in logudoresu; at leadu su terzu premiu chin sa poesia "Su frore de su perdonu" in su cuncursu de poesia ACLI 1996. Operas suas sono istadas pubblicadas in s'Ischiglia in sos annos ottanta.
Faghet parte de sa juria de su Premiu de Poesia Sarda de Posada dae su 1987. Membru de sa Commissione Cultura de sa Comuna de Torpè dae su 1996, at organizadu tres ediziones de su Premiu de Poesia Sarda "Torpè".
Cantadore a tenore comente contra, at cantadu chin su Tenore Selema de Torpè, dae isse fundadu, in medas biddas de Sardigna, in continente e in s'estero. Chin su Tenore Selema at pubblicadu unu nastru intituladu "Torpè" umbe benin cantadas ses cantones suas e unu mutu. In s'annu 1997, in s'iscola umbe trivagliat in Nuoro, at organizadu unu cursu po imparare sos pizzinnos a cantare a tenore.