Sas primas 20 lìteras a sos Tres Res ,
premiadas su 6-1-2000

¿Chie l'at nadu chi sos pitzinnos sardos no ischint sa limba nostra? Custas binti litereddas chi sedes pro legher nos mustrant su contrariu. Sunt sas mezus de sas tantas chi sunt arribadas a su cuncursu "Iscrie una lìtera a sos tres Res", organizadu dae s"Unicef, dae sa Sotziedade editoriale "Papiros" ,dae sa comuna de Ortzài e dae su cunsortziu B.I.M.. Unu cuncursu chi b'est dae su 1992 e chi onzi annu est andende e mezorende. Difatis, sunt semper de prus sos pitzinnos chi bi leant parte; e sas lìteras, iscritas comente si tocat, sunt prenas de zeniu e simpatia. Si bidet chi sa limba sarda no est prus cunsiderada una cosa betza, de nche ponner a un'ala, ma unu bene de abalorare e ponner in contu, ca nos servit pro su tempus benidore.
Sarvadore Serra


Antonedda Bandinu, Bitzi

Caros tres Res, mi naro Antonietta Bandinu, a bos ammentates de mene?
Non apo issu però si azes iscrittu sa literedda mea in su libreddu de s'annu passatu.
A l'ischites chi jeo devo andare a su Giubileu de su duamiza su duos de jannagliu chin s'azione cattolica ragazzi?
Voisi a bi enites?
No anzi bi devites ennere, ca pesso chi bos apana invitatu.
Vois como sezis pessanne: sos cammellos inuve los lassamus?
Non bos preocupetas, jeo isco una soluzione: o los prestamus a su Papa nessi si achete unu giru o los prennimus in sa piazza de Santu Pretu, vene ligatos a carchi colonna.
Però b'est su problema chi achen sos bisonzos e potene impestare su locu e ja l'ischites chi non semus in Calcutta.
Si non annata vene gai si comente b'apo unu ziu pastore chi istat a curzu a Roma, li potp dimannare si bor los mantenet in sar dies chi sezis chin su Nenneddu.
Ziu meu b'ata erveches e quindi sos cammellos ja b'ana a istare vene.
Voisi annates a Betlemme chin s'elicotero poi torrates a bos picare sos cammellos.
A l'ischites chi cuginu meu, izu de ziu Giovanni, m'ata regalatu una paia de iscarpeddas, tanno ca ini troppu chiaras mama mi las at tintas, pezzi sono diventatas porosas, timiapo a las idere e si aiapo poitu "nche las aiapo imbolatas cantu mi annata sa manu".
Tanno ca non las sopportaiapo prusu las apo cuatas bos naro comente: apo illiticatu s'iscarpiera poi ncapo postu cussas iscarpas r apo cuminzatu a las sotterrare chin atteras iscarpas e a sa ine su pianu est resessitu: infatti non sinne idiata mancu s'umbra.
I su periodu chi ini cuatas mama non b'ata mancu pessatu a issas e jeo ne ipo meda cuntenta.
Poi canno non m'istaiana prus nche las apo occatas e las apo datas a Piera sorre mea. Donzi tantu tanno istata "pruite non ti las as postas, istaias gai vene" ma ja si las godit Piera.
Caros tres Res como bos aeddo de sa vamiglia mea.
Custu annu so cuntenta xa a babbu non l'ata capitatu incidente malu.
Mama at imparatu a non risponnere in domo "pronto comuna de Bitzi?" ca unu paiu de vias l'ana tancatu su telefono in cara.
Pultroppo jeo e Maria Grazia sorre mea devimmus achere a bravas ca mama si no istat minezzanne chi non potimus annare a su Giubileu.
Piera est dispiaghita ca non bi potete annare.
Ciao Merziò, Ghesparru e Baldassarre, adiosu.
Sìlvia Murgia, Nùgoro

Tres res istimaos,
deo soe Silvia Murgia, soe nugoresa e soe in terza elementare; dia cherrere chi mi facazas unu piachere mannu, anzis duos: unu pro su mundu e s'atteru personale, pro mi fachere cuntenta.
Pro prima cosa preco chi tottu sos pizzinnos siana bene cherfios, mai iscuttos nè male trattaos, de modu chi crescan sanos, birtudosos e facan su mundu semper prus bellu.
Pro sicunda cosabos preco de mi sanare dae sa vitiligine, una ispezia de maladia de sa pedde chi non mi dat abberu fastidiu ca mi mancat solu una sustanzia, sa melanina.
Ma deo ispero meda chi mi passet ca soe istufa de esser pompiada male e umiliada a ripetere sempere, milli bortas, sa matessi cosa.
Deo bo lu preco meda ca zertos pizzinnos de s'iscola media o de quinta mi fachen sufrire nandemi paragulas lezzas, comente << bezza!>> o <<mostro!>>
Si m'azudaes non mi nch'appo a irmenticare mai de bois.
Bos saludo chin meda affettu.
A atteros annos mezus!
Sìlvia Talanas, Orune

Caros tres, jeo mi naro Silvia e isto in Orune. Jeo appo unu brade chi si nata Paolo, mama si nata Elisa e babbu Mario. Jeo chi sa bamilla mea isto bene, non nos mancata nudda ca babbu e mamma traballana bene e semus tranquillos. Però mancari gai si ponene su pessamentu po' nois chi semus galu minores ca in bidda bi sutzediti cossas malas. Però mi piaghet a iscire e a colare una bida prus alligra ca in iberru so annoiada. Non cherjo solu cussu, ma cherjo chi Orune siata rispettadu dae tottu, ca si bi beniti zente anzena cumprennet tottu su chi semus e tanno ponimus brigonza. Però a narrer sa beridade como parete lu siana cumprennenne, ca depet essere gai. Bos cherjo pedire senna unu donu: sa salude. Federico, bradile meu este maladiu e non ischiti aeddare. Noissi nos isforzamus po' lu cumprennere e tanno isce dibentata nerbossu. Nois nos accattamus male, bi soffrimus e a mimme mi ache' pena. Azzudadennos bois po' piaghere, nazebilu bois a Gesù Bambino ca bos ascurtat. Canno Federico sanat bos achimus unu bellu ispuntinu i su Cossolu, achimus esta po' ringraziare e totu sa zente ata a ischire chi azes attu unu meraculu
Zuanne Merèu, Orgòsolo

Caros tres Res,
eo so Juvanne Mereu, su chirichetto prus minore de Oergosolo.
Ando sempere a Missa e mi toccada a allegare in italianu, ma non m'aggradada. Huddas dies holas non so podiu andare a missa e appo perdiu su turnu tantas vortas pro ha mamma udu malavia e non podiada pesare hitho. Ando so torrau, su retore m'ada dimandau su pruite non fupo andau prus a missa. Pro ahere bella vigura huppo pessau sa risposta in sardu e, hurrende, l'appo narada in italianu. li depio narghere ha umos sempere in ritardu in frade meu, ma narau in italianu mi ch'este issiu: << Perchè siamo ritardati>>. Su pride s'este postu a ridere ma zae ada humpresu su matessi. Eo però depustis mi so abbizau ha appo narau una hosa diversa dae sa hi herio narghere. Unu regalu pro Nadale a mi lu ahiese? Narali a Don Michele a allegare sempre in sardu vintzas in missa gasi sos chirichetos no narana fesserias.
A medas annos
Pascale Manca, Orgòsolo

Salude, a bos amentades de mimme? so uddu pastoreddu de Orgosoloi s'annu holau bos happo pediu un ebba in su pudderiu. Proite non michelos azzes vattios? Vorzisi happo pretesu troppu. Ust'annu però, vattiemiche una hosa solu: o su pley station o sa domo nova, a sa i amoso cheste troppu vezza e antiha. A mamma vattiecheli unu rellozzu i ando moede a sos imperjos s'amentede a torrare impresse, e a mannai unu rosariu novu a su i juede ches'ussumiu a forza de lu ponere.
Hommo nos istoriamus de atteras osas: ma voisi in uve uzzes sa die i u ghettande tottu uss'aba dai helusu? Su hampidanu pariada unu mare e sos hampidanesos sos pihes nadande! Ando los appo vidos m'appo postu sas manos in conca e m'happo dimmandau: <<ma ustos re magios ie essini solu a nadale? E su restu de s'annu in uve che suni cravaos? Tando mi so ammentau a su mezzu vrostu sun pezzi sos cammellos i camminana solu in terra assutta e no in mesu de su ludrazzu.
In mesu de sas istorias, mi los dazzese sos numeros zustos de su enalotto? Hando che vinco ussos milliardos vorzisi, si erede mamma, bor dao unu millione vinas a bois. Si mamma non cherede zae boche mandamos una busta de oliva de unfettu.
Eo bos ringrazio meda pro sa domo nova e pro sos miliardos.
Bos saludo sperande de cottiare a bor viere sanos.
Zuanne Maria Mazzone, Buddusò

Caros Tres Res, amigos istimados, so Mimmiu Mazzone de Uddusò, so in qualta elementare. So azzigu bilbante, ma sa mastra mi narada puru chi appo unu coro pienu de amore. E tando, ceo bos devo pedire unu piaghere mannu mannu chi creo, dadu chi sezzis onos, mi l'azzis a fagher de siguru. Sezzis andende a sae Gesù Bambinu dae millenoighentosnonantanoe annos e bos intendene pius de me! Ceo dae battoro annos faghede so amigu de unu angheleddu chi si narada Antoneddu. Su coro meu sempre in pena ca sos primos duos annos ispriccaiada solu calchi paraula e resessiada a colorare. Cheria istare sempere acculzu a isse, ma devia faghere su compitu. Appenas chi podia istaia chin isse a lu ciogare. Si prima istaiada rizzu, como este malture in carrozzella. Su coro meu est sempre in pena, timo chi no molzada dae s'unu minutu a s'atteru. Intamore cando lu ido chin sa conca bascia in mesu de ancas. No appo paraulas pro bos narrere su dolore e su pedine meu. Como pedo de narrere a Gesusu chi hat dezzisu de lu lassare in carrozzella nessi chi lu lassede a conca rizza e li torrede su faeddu. A mi lu faghides qustu piaghere? No appo paraulas pro bos ringraziare.
Antoneddu Merèu, Durgali

Caros Tres Res,
bos pedo po piachere una cosa chi mi disizo semprere chi appa torra su carattere chi aio cando ipi minoreddu bos ispiego: zeo in dommo ipi su primmu izu su primmu nepode in dommo de Nonna Cossu e su prus minoreddu de sos nepodes in dommo de Nonna Mereu. Ipi po tottu unu zocu e tottu mi prenada de attenziones e de regalos e zeo ipi alligreddu chin tottu ipi onu e andao chin tottu. In domo achio a bonu e cando muttio a mamma e a babbu eniana derettu currende, e mi picana a pala e mi coccolana e mi ballana. Ma tottu custu este finiu cando este naschiu fradicheddu miu puite? Como bo lu naro! Cando ipi solu podio pranghere, zogare, cantare, abbochinare e nessunu mi narada nudda imbezze cando este naschiu issu tres annos fachede non podio mancu allegare ca si nono che lu ischidao non drommiada mancu a de notte e che ischidada a nois e quindi in domo non be depiada mancu olare una musca. Cando ade cuminzau a creschere eniada a minche isconzare sas cosas chi achìo e zeo lu gaddao e mamma mi narada: lassalu istare ca issu este pizzoccu, ca tue ses prus mannu. Non lu caries, non lu bries insomma pro mene este istà una cundanna. Issu ade custu carattere sempere alligru si achede notare chin tottu e faghede ridere cando allegada. Zuchede sos pilos ricciaos e parede un'anzeleddu ma imbeze este unu diauleddu. Cando mamma lu briada o lu gaddada imbeze de pranghere, a mamma li narada carchi cosa achende medas attos e nos ponede a ridere. Carchi orta mamma mi briada po carchi cosa chi ha cumbinau frade miu e zeo tando mi intendo in intro commente chi si minche istacchede carchi cosa cosa e tando divento nervosu e be li rispondo male chene motivu a mamma. Caros Tres Res, bos pedo de mi achere torrare su carattere de primma po supportare fradicheddu miu.Oppuru achieli cambiare su carattere a issu chi mi ubbidada e non mi acada nechidare. Meda vortas mi pesso: idi istau menzus si non be idi istau ma menzus ca b'este ca nos alligrada su locu.
Pascaledda Frore, Irgoli

Caros tres res,
commente istades? Ieo meta vene. Soe Pasqualina Floris, una pitzinna meta spapilla, mi lu narana tottus. Tenzo deghe annos e soe de Locula, una viddedda minoredda. Ieo tenzo una sorre, chi si muttiti Peppedda, chi est meta mala e propriu non mi supportata. Issa est pru manna e mene, si credete non so chie, si achet pazzaria ca picca pru bellos votos de mene, ca issa ischiti brincare in longu e in artu, ieo imbezzes rugo sempere a culu impipa cando brinco su mureddu de dommo. Cando si achete barrosa ieo l'istroco e gai issa m'iscuttiti, ma si commente est pru vorte e mene, a bortas picco pane lentu e po cussu!!! Non naro chi ieo so vona, ma issa mi vinghete puntos. Iiii! Sarvamentu, non arresonamusu de Zaime, frate meu, cando vinghe sa Juve issu mi picca in ziru nande chi s'isquadra mea, s'Inter este iscarsa, ma est un'aula puttita e po cussu nos iscuttimus. caros tres res bos pedo de achere diventare sorre mea pru vona e de achere frate meu unu tifosu de s'Inter. Auguro a tottu su mundu de colare unu serenu Natale in pache e in allegria
Alèssia Puletti, Zèsturi

Carus tres Reis
testi scriendu ua pippiedda de desci annus de nomini Alessia, deu bivu in Sardegna in dua idda in provincia de Casteddu a Gesturi ua idda accantu a sa jara, in guni ci vunti medas cuaddedus.
E poita non di incosciais unu e n'di enisi un unu a portai i regallus? Passaus a mimi: deu ai scolla non andu meda malli, po fortuna dengiu gana de studiai e mi prascidi. E a bois ita bos prascidi fai?
Passaus imoi a sa famiglia mia: deu seu figlia solla, non min di chistioneisti comenti esti leggiu, deu a mamma mia e a babbu miu du su imploru de mi fai u fradisceddu e ua sorriscedda, ma issus non mi ascurtanta nimancu.
Mamma mia esti ua maista e scolla e poisi pensai m'ossessionada sempri ca deppu studiai. Deu mi domandu poita a scerau u treballu leggiu aicci.
Babbu miu esti u tenenti de is carabineris, e sempri pigau da su treballu, deu m'arrosciu sempri di nau certas bortas chi po na diri no poidi lassai su treballu e poidi abarrai con mei ma arrespundidi ca depidi treballai e deu mi inchietu sempri. Ma immoi chistionaus de cosas serias:
Deu po Natalli ollia u regallu mannu chi ballidi miliardus, miliardus, e miliardus, custu mannu regallu esti sa pasci in su mundu deu bos domandu de ascurtai prus i letteras de sa pasci in su mundu che cussas ca ti domandanta de portai bambulleddas poita ci vunti pippieddus morendu, chi tenti famini, in mesu a strada, chi tenti maguadias leggias e ndi morinti ognia diri
Chiara Attene, Illorài

Caros Tres Res
deo so Chiara una pisedda de deghe annos e bos cherzo faeddare de unu piseddu, fedale meu, chi s'intende solu e iscossoladu proite l'er morta sa mama. Este dolorosu pro isse, ghirare a domo sua e buscare sa ianna serrada senza idere sa mama e su babbu chi este traballende; ma su babbu lu pode idere su sero a tardu, sa mama non la pode idere mai piusu. Segundu me issu puru in iscola non cherede faghere cumprendere a nois atteros su dispiaghere sou ma deo lu cumprendo e chirco de lu azzuare ma s'azzudu meu servidi e non servidi e duncas pedo azzudu a bois Tres Res de lu rendere allegru
Giada Corrias, Ortzài

Salude deo soe Giada Corrias, appo sett'annos e soe in segunda elementare. Caros Tres Res Gaspare, Baldassarre e Mechiorre, deo so zentile, so vona in iscola, piho sempere votos vonos, issho haere sa pasta, soe zentile un babbu e un mamma, ishho andare a ovaddu, a bortas azzudo a babbu meu po no lu lassare solu. Appo vinzas unu ane i si muttidi Lalì ha este unu pau maliedda. Ada ses meses. Soe unu pau pittrice puitte issho copiare sas pinturas dae sos libros.
Caros Tres Res a li podies narrere a Babbo Natale si podede bennere auve mene un s'islitta e sas rennas? &Mac218; SI &Mac218; NO
Bos appo attu sas casellas gai mi rispondies derettu.
E a boche venies peri vois a m'abbisitare a dommo, gai mamma bos umbidada a gustare e appustis zoamus tottus paris.
Caros Tres Res a l'issiese i nonnu meu e mortu.
S'annu passau sa Befana m'ada postu in sutta su appizzale sa cassetta de Anastasia.
Deo ando soe manna este a faere sa cavallerizza.
Istene Cossu, Sàrdara

Carissimus tres res chi de su misteriosu orienti eis portau a su divinu Bambinu donus meda preziosus, s'ia bolli domandai occannu unu regalu speziali. No bollu automobileddas e trenisceddus e mancu una calza prena de durcis de ognia variedadi, ia bolli invece chi candu bieis a su bambinu Gesus, di domandeis po mei una cosa, poita ca osatrus s'ascutat de prus de mei ca seu unu pagu arrebuginu. Domandeidi chi sa notti de Natali mi mandit unu bisu meda bellu in su quali do is iat babbu miu poita ca candu est mortu deu fia meda piticheddu e no m'arregodu prus sa facci chi pottadat. Seu seguru ca fiat bellu che unu frori, mi paridi de arregodai chi portadat sa barba longa e niedda. Deu seu meda gelosu candu biu is amigus mius gioghendu cun su babbu insoru e insaras mi paridit ca mi mancat de prus, spezialmenti immù che tempus de Natali.
Ogn'annu po Natali di scriu una littaredda, ma is cumpangius mius, mi faint meda beffas ca narant ca babbu no da poi liggi, ma a mei no m'indi importat.
Si domandu puru de portai a fradi miu mannu una scatula de coloris nous, poita ca ndi furadat is mius e a mamma mia porteiddi unu pagu de allirghia ch'est sempri trista e affrigida poita ca agattat traballu.
No si scaresciais puru de portai unu pagu de pasci in custu mundu turmentau e fadei in modu chi ognia pippiu tengiat su pani, sa domu e sa mamma suus accanta po du podi stimai.
Si saludu e si mandu meda basidus.
Simona Vèdele, Irgoli

Caros tres res,
so Simona Vedele, una pitzinnedda de deghe annos e bos conto unu vattu. A Vranziscu, vrate meu li piaghene abbottu sos gattos. Issu nde tenet unu, peri belleddu, iuchete sos ocros virdes, su pilu sempere luchidu, per forza, li acchete su bagniu onzi chita! Tenet vinasa sa cuccedda, chin dunu cestineddu e po capizale unu cuscinu de sas bambolas meas. Una die l'appo tiratu sa coa ed este abbarratu tottu sa die a miagulos e corcatu. Cando che l'atta venta a ischire Vranziscu "nai nai!" Issu po si vendicare che l'hatta vocatu s'ocru a su pupazzu meu, Doddo, chi nde so affezionata, lu teno de cando soe naschita! E a mie m'este dispiaghitu abbottu. Custu però m'est servitu de lezione e non solu appo trattatu vene sos gattos, ma tottu sos atteros animales.
Sandra Demontis, Segariu

Carus tres reis,
deu seu Sandra Demontis de Segariu e frecuentu su cuintu annu de sa scola elementari. Immoi si contu unu fattu successu a mimmi. In s'istadi sunteris chi fia gioghendu in negoziu, appu biu una srindia chi pesada dus chilus e cincuxentus gramus; a cussu puntu dd'hapu offia pesai. Candu mega a dda ponu a postu, sa srindia s'esti segada. Insa' mi seu posta a pensai cummenti hia a fai a dd'arrangiai, ma non m'è benniu nudda a conca. Dopu unu pagu, est arribau Robertu, fradi miu, e deu dd'happu contau su contu de sa srindia e Robertu m'adi donau una bella idea, "attaccaì sa srindia cun su nastru adesivu". Dopu chi Robertu hadi insistiu meda dd'eusu provau, ma no hadi funtzionau. Candu non scidiausu prus ita fai, seusu andaus anche mamma e babbu, e ddis heusu domandau chi si battellanta chi nosu seghiausu una rindia. S'hanti arrispostu ca non si fadianta nudda chi nosu nariausu sa beridade. Dopu chi s'anti fattu cussu discursu, nosu dd'heusu contau tottu su contu. Babbu e mamma si funti postus a rì, e deu e Robertu s'eusu papau sa srindia.
Carus tres reis,
po brexiei, fadei a modu ca is pipius narint sempri sa beridadi chi no, candu diventanta mannus, funtis tottus cummenti unu burriccu e naranta is faulas cummenti candu fiant picchioccheddus.
A tottu su mundu un immensu saludu e unu trancuillu millenniu.
Màrtzia Lai, Ortzài

Caros Tres Res mi mutto Marzia appo sette annos e vrequento sa segunda elementare. Appo unu vrade i si muttidi Nicola. Su disizzu meu pru mannu este ussu de biere a boisi e a Gesù. So nassia sutta su sinnu de su cancru, s'isport i m'agrada de prus este su nuoto e m'agradada vinas a mi inghere omente una sinnora.
Deol'isso aere sa sartizza e omo bo l'imparo: si depede seare sa pezza a antos minores poi si deppede sarzare, si deppe ponnere a modde in su vinu e s'aedu, apustisi si ghettada unu pau de sale e si lassada una parigha de dies a modde. Apustisi si ghetada a drainto de s'istintina e si appiccada po la lassare assuttare.
Sa pancetta imbezzzes si seada a antos mannos si moede unu pau de lardu s'ammaniada s'aeduun s'azzu e si vriada a suppra su lardu e sa pezza. Apustis si ghettada su pipere e s'appiccada po la lassare assuttare.
Ommo si aiese omente bos appo narau bos podies aere sas provistas po tottu s'iverru. Non bos pozzo imparare a aere su pressuttu puite non l'isso aere.
Però si veniese a m'abisitare bos l'imparada ziu Ninni, i este vonu meda po aere ustas osas.
Austinu Carta, Macumele

Salude a sos tres Res
mi naro Agostino Carta, isto in Macumele, tenzo sett'annos e so in segunda elementare. Bos iscrivo a so unu pàu uffusu. Deo so cressende in Macumele e istiono su macumelesu. Babbu ete de Ortzài e istionada s'ortzaesu. Mama este de Mamoiada e istionada su mamoiadinu. Cada sero in domo este una gherra puite cada unu istionada su limbazzu suo. Babbu mi narada i "s'importante este de non ch'irmentiàre su sardu".
Deo so untentu a omo lu deppimus imparare in scola, ma deppo imparare vinzas s'inglesu e su franzesu e sa uffusione ad a essere de prus.
Bos eriu domandare a bois: itte limbazzu istionaes?
Frantzisca Carboni, Garteddi

Caru Merzioro, Barrassardu, Gaspare.
Soe una pizzinnedda de Garteddi, e custa este sa secunna vorta chi bos iscrio, mi muto Vranzisca Carboni e soe in quarta elementare. Custu passatu bos appo petitu una cosa diversa dae sas atteras: diffatisi cherìo unu vratteddu novu, ma vinzasa a custu mammentu non b'este arrivatu; "non nazzisi accatatu?"
Po commo appo a fachere in manera de mi accuntentare de unu cuzzineddu chi devete naschire a Santos Gristos.
Commo teno quasi deghe annos e zertos ioccatuleddos non mi piaghene prus ca soe irmannianne, e mi piaghene sas cosas mannas.
Custu tempus soe sempere chin sa narata chi chero su "computer", ma babbu meu mi dommannata si este cosa de mannicare, ieo bi l'appo ispiegatu ma issu onzi die voccata a campu una iscusa.
Pessate chi cudda die mi nche este ghiratu nanne chi in su "2000" tottu custos apparecchos nanchi s'ana a irvaliare e de tenner passenzia vinzasa a su "2001".
Soe cumbinta chi canno mi vaeddat goi este solu po mi piccare in ziru.
Si vois caros Res m'izzisi attu custu donu vinzas a babbu bil'ippo imparatu a l'adoperare a issu puru!!!
Antoni Usài, Gèsturi

Carus tres reis
deu seu Antoixeddu, ma seu magguadittu chi mamma mi zerriada «cuaddu imbizzarriu».Deu seu de Gesturi cussa idda in cui c'esti sa lana de perda po fai is preseppius; Deu a scolla seu maguadittu e certas bortas seu maccu. Deu tengiu u fradi che si zerriada Massimilianu, che mi narada che chi no studiu mi occidi. Deu tengiu ua cumpangia che si zerriada Micaela, chi esti fetti chistionendi cun Maria, poitta funti accanta de bancu. Deu chistionu cun Francescu Serri che esti simpaticu. Bos prascidi sa pezza de proceddu? A mimmi giai. Deu ia bolli u videogiochi che si zerriada Play Station poitta è bellu. Deu ia bolli puru sa paxi de su mundu, aicci non di chistioninti prus in su telegiornalli. Deu tengiu ua sorri che si zerriada Marta, e non di chistioneusu de cummenti esti maguaditta: esti cummenti de mimmi e tottu. Babbu miu è fetti treballendi scedau! Faisi chi no treballidi aicci meda. Bos pozzu nai una cosa? Du scisi ca no mi prascidi a studiai meda e ca certas bortas pigu votus leggius. Deu seu de quinta elementari e arringraziu a Deus ca ciddappu fatta a arribbai finzas ainnoi. Ia bolli puru chi no acchicchiau prus, ca prasciu u mollenti. Sa catechista mia si zerriada Rosa e ha nau ca che ua dì si faidi giogai. Aicci mi prascidi!
Marina Fancello, Durgali

Carissimos tres Res
cando amus ischiu ca bos podiamus iscriere, sa mastra nostra at pessau ca nois allegaiamus de gherras, de pache, de libertade e de totu sos problemas chi be sono in su mundu. Zeo imbezes bos cherzo allegare de una cosa mia, chi m'est capità ocannu.
A mimi m'aggradat unu pizzinnu de s'iscola media, s'annu passau 'it in sa classe apresu a sa mia, e tando mi fit prus cumbeniu a che lu 'idere, como imbezes lu 'ido pacu e tando zeo faco e totu po lu zoviare. Bivet apresu a domo e po cussu soe semper chircande un'iscusa po essire. Issu est bellu che unu frore, chin d'una bella carena, ispipillu et semper alligru. Mi paret ca cada cosa l'andat bene, curret che una frizza, brinchait chi paret chi zuca sas alas in pes e po cussu medallias zai nd'est collinde a pare. In iscola est bonu e at intas medas passiones: su calcetto, su baket, s'andonzu a cresia. Ma in mesu a totu custas cosas a mimi mancu mi bidet. Cando lu zovio mi nd'irgonzo ma intantu sigo a fachere de tottu po lu 'idere. Una die, andande a brizzichetta, lu zovio e zeo dio aere chertu achere una bella figura, imbezzes mi nche so urrutta in dainnantis a issu. Podis pessare sa irgonza, mi deppo essere atta ruja che una tammata. Issu imbezes 'it tostu 'e su risu e zeo puru mi l'apo depia picare in risu po non pranghere. Poi si ch'est andau et m'at dassau che una maca: arrazza de amoradu! Chi Deu m'azuet ca sa cosa est male posta e po mene non bido ispera. Azzuaemis bois!
Stefània Pisanu, Gonnosfanadiga

Carissimus tres Reis deu mi zerriu Stefania seu ua pippia de sett'annus e seu in secunda elementari. Mi prascinti mera is pippius pitticheddus e seu cuntenta poita tra pagus mesis deppidi nasci fradisceddu miu. Seu cuntenta puru poita tengiu una domu bella chi tenidi tottus is comodidadis e aundi bivu cun mamma e babbu e sorri mia chi mi olinti tantu bei. Seus totus preasciaus po' su pippiu chi depidi arribai e po' custu deu seu preparendumi a essidi prus brava. Appu intendiu ca in su mundu ci funti pipius che non teinti nudda, nimancu un'arrogu de pai, ni bistidis. deu tengiu tottu e dus ia bolli aggiudai, ma seu ancora pitichedda e non sciu ita fai. In su mundu ci funti is guerras e tantas maladias chi fainti morrimeda genti deu ia bolli chi is guerras finessant e chi is bravus dottoris siganta e cicai mescias nobas po' sconfiggi tottus is mobedias chi ci funti in su mundu.