PREMIU 'E POESIA SARDA "POSADA"
 Domo

 Sezione verso libero

 A dainnantis

 

 

Menzione

Lunas de trigu

Tonino Fancello - Dorgali

 

LUNAS DE TRIGU

Eremittas antigos...
perdios...
in scura dinnidade
soliana 'e sa cria 'e sa terra,
arrennadores de entu...
travican galu
sas lunas allatadoras
innidas e piedosas de lacrimas
arestes,
intessias in sos miliares
passilenos de su tempus.

Mimulas de entu...
trasportan sas lunas de trigu
iffustas de pruere 'e nuraghe
jumpande sas tramas de neula
in su chelu
faghendeli s'ispola a sa terra.
Aerzos antigos...
a ispassu
in sos surcos fulanos semenados,
trambugan...sos ojos...sa mirada
in s'istincu lughente 'e s'impudile,
seperande in s'adrommu 'e sas nottes
su suntu 'e sa paristoria
intessia
in sas siendas antigas de Sardigna.

Lunas de trigu...
trisinan galu su fragu contomosu 'e sa tula
murmuttande su tempus mustrencu
'e s'antigu valore...
'ue si son perdios sos bezzos cussizos.

Lassande...
s'antiga berritta chin s'arche manzàs de sudore,
solas...solas...
chin su diliriu 'e sos tunchios de suttaterra.