Nota introduttiva:
Fermati, poeta, e ti canterò rime d'amore, se di amore ti accontenti. Tu sei capace di addolcire lacrime salate, consolando il pianto delle madri, gridando in favore della pace, esaltando il lavoro degli uomini, ridando il sapore alla vita. Il componimento è tutto sorretto dalla freschezza del ritmo delle quartine, che si snodano come un canto d'amore per la vita.

TI TORRU GRATZIAS

Frima poeta... si cun mei stentas
m'as a fai donu e po s'onori
t'ap a cantai rimas de amori
si sceti de amori t'acuntentas

ddu sciu ca ti pesat su dolori
chi ti tragas nòbili e fieru
candu stegas in rima su misteru
chi mudat a sa vida su sabori

ma tui tèssis, tèssis poesias
i a puntus de steddus in is tramas
su prantu de arrisu mi ricamas
e mi zùccuras làmbrigas salias

t'apu biu consolu de i' mamas
candu prangint sànguni po is fillus
ses làmbriga siddad'aintr'e lillus
chi nemus at a sciri cantu amas

t'apu 'ntèndiu prantu in sa gruta
beridadi 'ndolada de dolori
ses pipiu chi torrat su colori
a froris chi sa vida nos imbrùta(t)

t'apu ligiu 'n paginas de gherra
sparrancàdas aboxinèndi paxi
e cun lèbias alas de araxi
intrai in sa peddi de sa terra

t'apu biu a prenas farrancadas
donai generos'a su beranu
prellas fatas cun fini filigranu
sudadas in baratàs gerronadas

t'apu 'ntendiu candu fia morta
i a sa vida chi m'asi torrau
amori po tui apu cantau
òi ti ddu cantu un'antra 'orta

po chi de prus t'allebit su dolori
su chi tui nòbili e fieru
ndi sçuscias cun rimas de misteru
chi torrant a sa vida su sabori.

Si ti càpitat poeta de passai
ancora ananti 'e custa porta
arregoda ca... si no seu morta
a tui tepu gratzias torrai.