PREMIU 'E POESIA SARDA "POSADA"
 Domo

 Sezione rima

 A dainnantis

 

 

Segnalazione

Babbu Nostru

Santino Marteddu - Siniscola

 

 

 

 

BABBU NOSTRU!

Attrividos ca tropp'hamus peccadu,
e puru di precamus Deus meu,
comente Cristos nos hat insegnadu:

O Babbu Nostru, mannu, senza neu,
de Chelos artos Primu Abitadore,
funtana de consol'e de recreu.

Dae te isettamus, o Segnore,
unu mundu 'e paghe, semenadu
a piantas de ben'e de amore.

Su lumen tuo siat laudadu
da onz'anima ona che Abele,
e lu timat Cainu chi hat arzadu

contr'a su frade sa manu crudele.
Sia fatta sa tua volontade
in custu mundu mal'e pren'e fele.

Su pane saporid'in cantidade
no manchet ma'in mesa; santu donu
de chie vivet in sa povertade.

Umiliados pedimus perdonu
de sos peccados chi nos sun de pesu;
meritamus su focu, ma ses bonu.

E sicuros de haer ben'appresu
de s'Iscrittura s'arta lezione,
perdonamus sos chi nos han offesu.

Imped'a su Malinnu, ch'est mazzone
de trassas bezzas e pren'e rancore,
de nos induer'in tentassione.

Onzi mal'alluntanan'onzi dolore,
umìlia sos signores de sa gherra
Onz'ispina si mudet in fiore,

...siat in Chelu, siat in sa terra!