COSSIZOS A SOS MESANISTAS

 

In Maccumele (extra moenia, dimis narrer, in terra de sa no 'alu istudada rivale LSU) sos sustenidores de sa LSM, sos mesanistas, de Peppe Corongiu & alii, si sun abbojados e faeddados. Sas cronigas naran chi fin treghentos, fini jovanos e fortes, ma chi sun ancora bios pro custu immane irminzu chi si parat innantis issoro: su' e dare a sos sardos una limba cun cozones e contracozones. A narrer su 'eru issos creen chi una limba ją bi siat e bastet de seberare unu dialettu calesissiat pro aer su sentidu de appartenner a una cumonidade nostra. Custa cosa l'aio ją intesa, comente aio ją intesu chi si trattat no de imponner motu proprio una fromma dialettale a sas atteras leadas de su caleidoscopigu mundu sardu, coghi de fagher una limba burocratica pro mezorare s'interfaccia intre custas leadas: itte mezus de sa limba naschida in Aristanis, chi jughet cosa de su cozone logudoresu, e cosa de s'atteru campidanesu? Custu pessaio: chi Aristanis, inue est paschida sa pasionaria Eleonora, fit istadu seberadu, antis ischeriadu pro custu arrettamentu dei su sardu, ma mi so seradu derettu chi su logu no diat esser Aristanis, ma Samugheo (3000 abitantes) e mi so postu sa dimanda: no at esser chi Aristanis est azig'azigu pius campidanesu chi no logudoresu? E sa risposta paret siat custa. Duncas sa Trantor limbistiga dei sos sardos  tet esser Samugheo, pro sos mesanistas. Igue si cojuan a premore sos duos dialettos. Ją pessaio chi cun Aristanis, chi est comente provintza sa pius povera de Sardigna, chi no jughet portos, aereoportos, jornales, univessidades, tv, una intelighentzia connotta e cumproada, fit bistadu diffitzile custu irminzu, ma como bessit a fora Samugheo, chi deppet aer calidades a mie isconnottas, o minde so drommidu e no minde so abbizadu. Comente cossizu realistigu a Corongiu & company potto tando dare de importare zente in Samugheo, de la fagher ingranire abberu a capitale dei sos Sardos, una corte lughizente e piena de ammaju chi pottat ispingher mizas de atteros sardos a si che frimmare e si cojuare intre issos. Ispero chi Corongiu appat su 'inari bastante pro custa sorte de Beranu Sagru sabinu. Si su dinari b' est, deo so a dispositzione.