Acicastello

 

Disiatu da re e regine,

di vicinu e di luntanu.

Arrivavanu ppi mari

ppi putiriti taliari

ppi putiriti pigghiari.

                Quantu storie s’anu scrittu

      di baruna e barunissa

      di fantasmi scanusciuti

      ca caminanu ppi casa.

E c’è ccu susteni ancora

di sintiri li lamenta

e di vidiri nu faru

ccu na fimmina ‘mbillenti.

                Strittu o piettu ti tinissi

      la figghiuzza da to terra:

      Agatina la Santuzza

      di li ranni e di la genti.

Seculi di storia amara

li stagnuna ntò sutterranu,

lu rinchiusu ddo ddammusu

‘cchiana pianu e silinziusu,

ma s’infila ni la menti

di cu ti veni a truvari.

                E traspurti la so arma

      a putiri visitari

      li biddizzi di na vita

      ca nun po’ cchiù turnari.