Bisiones  (isterrida)

S'edade mezus est sa ptzinnia
fora de pensamentos e tristuras.

Cun su risu in sas laras
pitzinnu drommi e pasa
Como chi podes serenu drommire.
Sas lambrigas amaras
assilbalas a crasa
da chi su mundu l'as a connoschire.
intantu sogna como
sa paghe in dogni domo
de chelu terra e mare a nde godire
toccandesi sa manu
bianc'e nieddu, dogni cristianu.

Bisande ti che 'olas
in montes e in mare
sena paura de bombardieris
De abba Sas pistolas
po torrar'a giogare
sos bandidos cun sos carabineris
Fusileddos de giogu
b'eppad' in dogni logu
missiles e cannones de paperis
buffande abbas e binos
totucantos prodottos genuinos.

In logos de incantu
currinde che crabolu
ne muidas dannosas nč "istresse",
no' connoscas piantu
non b'eppad'oriolu
de bucos de siringas e AIDS,
e dogni maladia
cambiada in allegria,
tottu sas cosas malas a s'imbesse,
nč zente traitora
chi de su tou ti che cheret fora.

E sogna sos potentes
a dogn' ala 'e sa terra
armados solu de bona volontade
po chi sos continentes
recusent dogni gherra
e-i su frade rispetted'a su frade.
No' nde tenzas disizu
('e) torrare in presse, o f'izu,
a custa tribulada umanidade.
A da chi ti nd' ischidas
sas oras malas chi siant finidas

Iscanu, Abrile 1986
A. Piras