Torra sa libertade

Peri sos montes che sirbone areste,
peri sas roccas giogande a cua-cua,
puite no' ti nde l'ogas cussa 'este?...
Torra sa libertade a sorre tua.

Da fatziles balanzos ammajadu,
che su muschittu da su 'inu nou,
mi ch'andat male su male leadu...
Torra sa libertade a frade tou.

Presoneri de cudda idea mala,
Brivu de sos lugores de sa die,
sas malas trassas ponzes a un'ala...
Torra sa libertade fin’ a tie.

Pone pes in sa giusta caminera
si no' l'as fattu fintzas a-i como,
in sos gianniles lassabi un' ispera...
Torra sa libertade a dogni domo.

De custa 'oghe nde fettas tesoro,
de onestade sies bandela e insigna,
a s'amigantzia l'aberzes su coro...
Torra sa libertade a sa Sardigna.

Antonio Piras