|
DOTTRINA CRISTIANA IN VERSU
|
Questo lavoro del Pilo (1716-1786) è un compendio della Dottrina cristiana
esposta in forma poetica. L'intera opera che è formata da 123 quartine
per complessivi 492 versi a rima incrociata, si suddivide in 18 parti in cui affronta
i diversi temi della fede.
Su signali de sa Gruxi
Su Babbu nostu
S' Ave Maria
Su Gloria Patri
Su Credu
Is dexi Cumandamentus
Is Sacramentus
Attu de fidi
Attu de speranza
Attu de caridadi
Attu de contrizioni e propositu
Candu e calis attus depit fai unu Cristianu
Obbligazionis de su Cristianu
Avvertenzias po beni cunfessai
Avvertenzias po beni comunigai
Avvisus a su Cristianu
Massima cristiana
|
Su signali de sa Gruxi A su Celu, o Cristianu, Ti portat peri sa manu, Chi est camminu, ghia e luxi. Candu in fronti fais sa Gruxi Domanda a Deus vittoria Contr' a dogna vanagloria, E chi sempri ti diat luxi. Po osservai is cumandamentus Illuminat sa rexoni, E fuit sa tentazioni De is malus penzamentus. Cun sa Gruxi siat guardàda Sa bucca tua de mali, Cun custu santu signali Tenidda sempri segliada. Fendi sa Gruxi in su pettus Domanda a Deus favori; Cun d' unu santu timori Po moderai is affettus: Chi non pecchis, chi no arruas In is culpas cotidianas; Ma chi santas e cristianas Siant is operas tuas. |
|
Babbu nostu, chi gloriosu Ses in su Celu adorau, Sempri siat santificau Su Nomini tuu diciosu. Su regnu tuu conquistau Cun tanti pena e sudori Bengat a nosu, o Signori, Chi po custu nos' has creau. Sa tua santa voluntadi Pregu cun totu su zelu, Chi in Terra coment' in Celu Si cumplat po eternidadi. Su pani cotidianu Sustentu de dogna dì, Bollas hoi donainosì Cun piedosa e larga manu. Coment' olis, perdonaus Is aggravius chi arriceus: Aici tui, o bonu Deus, Perdona a nosu is peccaus. De ruiri in tentazionis Sempri preservanosì: De mali attesianosì In totu is occasionis. |
|
|
Deus ti salvit, santa e pura Bella Sposa nazarena; De sa grazia tui ses plena Prus de dogna creatura. E cun grandu ammirazioni De sa Corti celestiali Su sinu tuu virginali Est de Deus abitazioni. In sa discendenzia, afflitta De nosaterus, Reina, In manera peregrina Solu tui ses beneditta. Benedittu prus e prus Siat cuddu Fruttu divinu Chi portestis in su sinu: Benedittu siat Gesus ! Tui chi ses Mamma clementi De su Deus Redentori, Deh ! po dogna peccadori Prega a Deus onnipotenti. Pregaddu, o santa Maria, Po custa vida penosa, E po s' ora turmentosa Chi heus a essi in agonia. |
|
|
A Deus Babbu Creadori, A su Fillu Redentori, E a s' Amori sustanziali Infinita gloria uguali Immoi siat e in dogna edadi, E in totu s' eternidadi. |
|
|
In Deus creu firmamenti Babbu totu poderosu, De celu e Terra gloriosu Creadori onnipotenti E in s' unicu Fillu amau Gesu Cristu Salvadori, Rei e nostu Signori Chi est ab eterno ingendrau In tempus s' est incarnau In sa Virgini Maria; E po essiri nosta ghia De Celu a Terra est calau. E non po opera umana Est cuncebiu (oh ispantu !), Ma de su Spiritu Santu Po virtudi soberana. Po salvai is peccadoris Patit acciottus, turmentus, Spinas e maltrattamentus, Beffas, angustias, sudoris. Suffrit sa morti penosa Tres oras agonizzendi, Su sanguni derramendi Ind' una Gruxi affrontosa. Luegu mortu est abbasciau A su Limbu vittoriosu; Sa terza di gloriosu Creu ch' est resuscitau. Triunfanti e graziosu A is Celus est arziau, A sa destra est assentau De Deus Babbu poderosu. De aundi Gesus una dì Hat a beni magestosu, Giugi giustu e rigorosu A giudicainosì Creu in su Spiritu Santu Su propriu divinu Amori, Spiritu consoladori, Chi nos' hat amau tantu. Creu sa Resurrezioni, E in sa Cresia Cattolica, Una, Santa e Apostolica; De is Santus sa Comunioni: Chi cun piedadi, Po isciolli dogna peccau, Gesùs a sa Cresia hat dau Su poderi e facultadi. Creu chi depeus andai A s' ora de sa partida, A un' atera eterna vida Chi non tenit fini mai. |
|
|
Unu solu Deus adoru Soberanu, onnipotenti; Dd' amu cun totu sa menti, Cun totu s' anima e coru. Non giuris, non giuris mai Né in vanu, né falsamenti, Ma a Deus teni presenti Candu cumbenit giurai. Sa domu de is giuradoris Portat sa sentenzia scritta, Chi hat' essiri maleditta Cun totu is frastimadoris Guarda is festas cumandadas, Bii sa missa attentamenti, Cunfessa frequentementi Si bolis bonas annadas. Si nosaterus boleus Su sustentu sufficienti, Venereus divotamenti Is dis e cresias de Deus. A babbu tuu riverenzia, Si disigias larga edadi; Serbiddu cun caridati, Cun carignu e ubbidienzia. Non boccias, né bollas mali, Non ti venghis: mira a Deus; Non torris mali po peus, ch' est dittamini infernali. Cantu tui prus perdonas Is aggravius e is offenzas, Merescis prus chi non penzas De palmas e de coronas. Cun su viziu disonestu Manteni sempiri gherra, Ch' est un' Angelu in sa terra S' omini puru e modestu. Si committis attu impuru, O impura corrispondenzia, Tenis senza penitenzia, S' Inferru tenis seguru. Restitùi si has furau Senza prus dilazioni; Senza restituzioni Mai has' essi perdonau. Si t' applicas a furai Has a perdi su chi tenis; Sendi furaus is benis, In fumu s' indi' hant' andai. Non murmuris, e raffrena Sa lingua precipitada, Ch' in pena hat' essi abbruxada Si pigas sa fama allena. Né mulleri, né ricchesa De atiri has' a disigiai, Guardarì, non pecchis mai, Né arruas in impuresa. Non disigis: terra e pruini Totu in brevi hat a torrai; Tui ses nasciu po gosai Una gloria senza fini. |
|
|
A prus depis osservai Su chi sa Cresia cumandat, Cincu cosas ti domandat, Biri missa e cunfessai. Po no incurriri in su dannui De gravissimu peccau, Cunfessai ses obbligau A su mancu un' orta in s' annu: E ancora comunigai In casus perigulosus; Is giaungius rigorosus, Candu podis, depis fai. A sa Cresia contribui Sa decima giustamenti, Senza fraudai nienti, E si depis, restitùi. |
|
|
Po rimediu de peccau, E de grazia po is aumentus, Setti santus sacramentus Cristu in sa Cresia hat fundau Po su dannu originali Su Battismu hat inventau; Sa Penitenzia hat lassau Contra sa culpa attuali. Sa grazia cunfortativa Donat sa Cunfirmazioni; E sa santa Comunioni Sa ch' est grazia nutritiva. Po cumbinciri in sa morti Tentadori e tentazioni, Causat s' Estrema Unzioni Sa grazia chi ti fait forti. Donat grazia, e grazia tali Cali domandat s' istadu In cussu prus altu gradu S' ordini sacerdotali. Po biviri cun amori, E portai sa Gruxi impari, A is coiàdus hat a dari Su Matrimoniu valori. |
|
|
Creu in d' unu solu Deu Giustu remuneradori, Cundennat su peccadori E chi is bonus salvat, creu. Creu s' alta Trinidadi A chini offergiu su coru, E tres Personas adoru In d' una sola Deidadi. Babbu e Fillu, duas Personis, Terza est su Spiritu Santu, Ugualis in totu cantu Is divinas perfezionis. Creu puru chi su Fillu Pighessit carri mortali In su claustru virginali De Maria candidu lillu. Creu chi hat suffriu passioni, Chi est mortu e resuscitau, Chi a is Celus est arziau Cumplida da redenzioni. De giugi in finis cun zelu A su mundu hat a torrai, E giudichendi hat a dài A dognunu o Inferru, o Celu. Creu totu finalmenti Is misterius rivelaus; A sa Cresia declaraus De Deus onnipotenti. E totu custu ddu creu Po chi est summa beridadi, Incapaci de falsidadi, S' altu Autori ch' est Deu. Chi inganneis, no est possibili, Veracissimu Signori; Deus seis Bosu e Creadori, Seis beridadi infallibili. |
|
|
Fidu in sa osta clemenzia, Signori, de mi salvai; Grazia in vida m' heis a dài E in sa morti s' assistenzia. In is promissas, Signori, Seis fideli summamenti; Operendi santamenti Ispettu grazia e favori Fidu cun certa firmesa Chi m' heis a dài sa gloria; Fendi opera meritoria De cussa eterna bellesa Cussa benavventuranza De biri e gosaiosì Osi pedu dogna dì Umiliau e cun cunfìanza. |
|
|
Os' amu, Deus adorau, Amabili summamenti, Bonidadi essenzialmenti E dignu d' essiri amau Os' amu, veneru e adoru, Summu Beni e infinitu; Osì tengu e portu iscrittu Eternamenti in su coru. Sempri amai osi bollìa Amantissimu Signori, Cun d' unu infinitu amori, E ancora prus si podìa. Po cumpliri a custa lei Su prossimu amu tambeni, E ddi pregu tanti beni Cantu disigiu po mei. Cun custu propriu amori Non solu amu a is amigus, Amu puru is inimigus Po amori ostu, o Signori. |
|
|
A peis bostus, o Signori, Cunfessu ch' hapu peccau; Comenti heis tollerau Tanti ingratu peccadori ? Po prangi is peccaus mius, Infinita magestadi, Mari immensu de bundadi, Is ogus formint arrius. Ahi ! e cantu hapu peccau ! Ahi ! e cantu os' hapu offesu: De Bosu, ahi ! cantu attesu Mi seu, zurpu, apartau ! Però immoi umiliau Cun totu su coru sentu, E de veras m' arrepentu De cantu os' hapu aggraviau. Ddu sentu po chini seis, Ddu prangiu confusu e afflittu; Coru umiliau e contritu, Signori, non disprezzeis. Rei supremu de is Reis, Non po sa pena incurrida, Non po sa gloria perdida, Mi pentu po chini seis. O Deus miu, po os' amai Su sanguni e vida dongu, E firmamenti propongu Mai prus, mai prus peccai. Propongu puru apartai Perigulu, e occasioni, E fai sa cunfessioni, Mediu certu a mi salvai. Confidu totu cumpliri Cun sa grazia chi domandu; A Bosu m'arrecumandu, Siais prontu a m' assistiri. |
|
|
Una de is obbligazionis Est fai attus de dolori, De Fidi, Speranza, e Amori In algunas occasionis: A prus chi po bortas varias Dogn' annu depis fai Custus attus; no olviai Cosas tanti necessarias: Lompendi a conoscimentu E a s' usu de sa rexoni, Candu appretat tentazioni O arricis sacramentu. Cun santa rassignazioni, Candu hat essi sa partìda De custa a s' atera vida, Procura sa Contrizioni. Custus attus frequentai Depis in vida e in morti, Si una diciosa sorti Bolis sempiri gosai. |
|
|
Su Cristianu a si salvai Quattru cosas hat' a isciri, Su chi hat a crei e pediri, Su de reciri e osservai. Su Babbu nostu declarat Su chi pediri depeus, E su chi de Fidi creèus Su Credu nos' imparat. Cuntenint su de osservai Is santus Cumandamentus, E i setti Sacramentus Su de recìri e leài. Imparai ses obbligau Credu e Cumandamentus, Babbu nostu e Sacramentus Basciu pena de peccau. Si no dd' imparas, comenti Has a creiri e pedìri, Guardai e arricìri, E bivi cristianamenti ? |
|
|
Su Cristianu chi hat peccau No ispettit remissioni, Si podendi, Cunfessioni Non domandat ostinau. Custa est prima condizioni Po sa vera penitenzia; Esamina sa cuscienzia, Si non bolis cunfusioni. A Deus t' has a incumandai; Circa e ponidì in sa menti Cun coidàu diligenti Is culpas de cunfessai. Is fueddus esamìna, Operas e penzamentus; Si contr' a is cumandamentus S' anima has postu in ruina. Sa segundu condizioni Chi appartenit a s' essenzia De sa vera penitenzia, Est dolori e contrizioni. Però hat' essi cuncebida Custa vera contrizioni Cun firma risoluzioni D' emendai sa mala vida. I essendi soberanus Custus attus, est forzosu Pedìri a Deus piedosu Sa grazia cun ambas manus. Sendi aici apparicciàu, Senza nienti riservai, A su Cunfessori has a nai Cantu scis chi has peccau. Si iscusas, o su chi est peus, Citis contra cuscienzia Is culpas cun avvertenzia, Sacrilegu ses cun Deus. Fatta sa Cunfessioni Cun umili rendimentu, A is avvisus ista attentu, E aspetta s' assoluzioni. Luegu e un santu fervori, Senza puntu dilatai, Sa penitenzia has a fai Chi ponit su Cunfessori. |
|
|
Cun attenta divozioni Tres cosas ispecialmenti Has a teniri in sa menti Po sa santa Comunioni. Primu: t' has a cunfessai De dogna culpa mortali, E cun giaungiu naturali A Deus has a invocai. Chi t' assistat, e ti donit Sa grazia po dd' arriciri; E po cussu has a pediri Chi su passau ti perdonit. Segundu: chi a su Signori, Chi est' in s' Ostia presenti, T' accostis divotamenti Cun Fidi, Speranza e Amori. Andendi a comunigai Chi su prus riccu tesoru Tui arricis in su coru, Depis crei e meditai. Est sa terza obbligazioni; Grazias a custu Signori Depis dai po su favori, E po tanti dignazioni. Pustis chi s' Ostia has sumìu, Non partas de cresia ancora, A su mancu una mes' ora Considera su chi has reciu. Ammira custa finesa, Cuntempla cun cantu amori S' est dignau su Signori, No ostanti sa tua bascesa. E giai ch' intru de su pettus Ddu tenis sacramentau, Offeriddi umiliau Totu cantus is affettus. Manifesta cun cunfianza Sa tua grandu poberesa; Cunfessa sa tua vilesa, Ma non perdas s' isperanza. De tanti riccu presenti Mai perdas sa memoria, E pregaddu ch' in sa gloria Dd' alabis eternamenti. |
|
|
Impegnadi de un' orta In biviri santamenti; Sa Fidi teni presenti, Chi senz' operas est morta. Su nomini de Cristianu Non bastat po ti salvai; Est precisu conformai Sa vida, si no est invanu. Non basta solu su crei, Est necessariu operai; Crei beni, e mali fai Est disprezziu de sa lei. Si s' opera no has a fai De sa Fidi accumpangiada, Ahi ! anima desdiciada, A su Celu no has' andai ! Teni sempri in sa memoria Po non peccai in eternu; Una morti, unu Infernu, Unu giudiziu, una gloria. |
|