1) Gv 20,19-31 Perdas arrumbulladas e gennas cungiadas

20,19 A merì de cussa di e totu, sa primu dì de sa cida, sendu cungiadas is gennas de innì anca fiant is iscientis, ca timiant a is Giudeus, fut benniu Gesus, e si fut postu in su mesu e ddis at nau: «Paxi a bosatrus».
20 At nau aici e agoa ddis at amostau is manus e su costau. E si fiant meda alligraus is iscientis, biendi a su Sennori. 
 

21 Tandus Gesus ddis at torrau a nai: «Paxi a bosatrus. Comenti su Babu Mannu at mandau a mimi a su mundu, aici e totu deu mandu a bosatrus a su mundu». 
22 At nau aici e ddis at alidau ananti e ddis narat: «Arricei Spiridu santu.
23 A chini eis perdonau is pecaus, ddis abarrant perdonaus, a chini ddus pumpiais, is pecaus ddis abarrant pumpiaus».
 

24 Ma Tomasu unu de is Doxi apostulus, cussu chi ddi narànt Alloba, non fiat cun issus candu est benniu Gesus.
25 Is atrus iscientis tandus ddi sighiant a nai : Eus biu a su Sennori! Ma issu ddis at nau: «Chi non biu in is manus suas su semmu de is obbilus e no ddui pongiu su didu e chi non pongiu sa manu in su costau suu, no dd’ap’a crei mai.
 

26 E a is otu dis, is iscientis suus fiant torra aintru e Tomasu puru fiat cun issus. Benit Gesus, a gennas cungiadas, si fut postu in su mesu e at nau: "Paxi a bosatrus!".
27 Apustis narat a Tomasu: "Beti su didu tuu a innoi e castia is manus mias e beti sa manu tua e ponidda in su costau miu, e non siast unu chi non creit, ma unu chi creit".
28 Tomasu at arrespustu e dd'at nau: "Ses tui, Sennori miu e Deus miu!".
29 Gesus ddi narat: "As crètiu poita ca m’as biu? Biadus cussus chi creint fintzas e chentza de ari biu.
 

30 Medas atrus sinnalis puru at fatu Gesus ananti de is iscientis suus, chi non funt iscritus in custu libru.
31 Ma custus funt istetius iscritus po bosatrus, po crei ca Gesus est su Cristus, su Fillu de Deus, e po chi, tenendi fidi, potzais bivi in su nòmini suu.