Tiu Atalante

Unu arresonamentu in su cales totus tenen arresone.

antologia

Ai como sun jai colados duamill' annos chi   unu zovanu chi si narait Atalante, essende disitzosu de imparare s'arte 'e s'avocadu, haiat chircadu a su filosofo Protagora a ddu leare a ischente in s'iscola sua. Su cales chi Protagora meda fud'istadu cuntentu de acollire unu allievu intelligente e de bonas intragnas. E gosi totu ar duos haian cuntrattadu: jeo happo a tenner cuntivitzu de ti imparare s'arte de sa retorica e tue m'has a pagare sa metade de su cantu m'ispetat prima e cumintzare, e s'atera metade cando has a bincher sa prima causa legale tua, ddu hat tempus. Ma cando tiu Atalante, po motivos suos, haiat intramesadu ritardos a cumintzare s'arte, su filosofo Protagora bene haiat fattu a ddu zitare in tribunale, po si fagher pagare sa segunda metade de cantu tiu Atalante ancora ddi depiat. Sos duos avocados haian discutidu gosi sa causa issoro: tiu Atalante haiat cumintzadu a si difender:" Protagora no tenet arresone, anzis tenet tortu de siguru e jeo no ddi depo pagare propriu nudda. Si issu inchet custa causa, jeo no happ'haer bintu sa prima causa mia, e segundu sos pattos, no ddu depo pagare. Si invetzes perdet, e tando no dd'happo a deper pagare po sententzia de sa corte. Issu, chi incat o perdat, jeo no ddi depo nudda. Hait atacadu su filosofo Protagora: "Atalante narat chi no mi depet pagare, e insistit a ddu faere, traitore chi no est ateru. Ma no tenet arresone, puite si issu inchet custa prima causa legale, e tando segundu sos pattos mi depet pagare. Si perdet sa causa, tando mi depet pagare po sententzia de sa corte". Tra rinvios de judizes, apellos, arrecursos a tribunales internazionales, no si funi postos de acordu e sa causa est ancora in cursu.

dae Sas Craes

antologia