Sa bellesa de Clori
(retroga torrada)
1
Ite bella chi ses, cantu m'aggradas,
Cantu a sos ojos mios ses grasciosa!
A mes'abrile non fiorit rosa
Colorida che tue e attraente...
Tue faghes amante unu serpente
Cun sos risittos tuos e miradas!
2
Ite bellesa in gradu soberanu
Che tue no nde 'antat ater'una
S'edad'antiga ne-i sa novella...
Bellos sun sos fiores in beranu,
Est bella s'aurora e-i sa luna
Ma tue ses ancora pius bella!
3
In sa persone lughes che istella
E incantu dezisu in ojos giughes,
In sa persone che istella lughes
E ispannas sas nues cun su risu,
In ojos giughes incantu dezisu
Pro lassare ogni coro a pesa-rue...
Bellos sun sos fiores in beranu,
Est bella s'aurora e-i sa luna,
Ma ses ancora pius bella tue!
4
Sa Sardigna chircadela in totue,
Ch'est vanu a nd'incontrare tantu digna;
Chircadela in totue sa Sardigna,
O isparghide vela in altu mare;
Est vanu tantu dign'a nd'incontrare,
Essende a totucantas superiore...
Bellos sun sos fiores in beranu,
Est bella s'aurora e-i sa luna,
Ma tue pius bella ses ancora!
5
Angelica, Didone, Eleonora
It'est su ch'han de raru in paragone?
Eleonora, Angelica, Didone,
E-i sa matess'Elena, ispartana,
De raru in paragone it'est su ch'hana
Pro chi naschidas sian da-e-res?
Bellos sun sos fiores in beranu,
Est bella s'aurora e-i sa luna;
Ma tue pius bella ancora sese!
6
Pro cussu iscau tou haer mi des
Sinzeru adoradore sempre a prou;
Pro cussu haer mi des iscau tou,
Mi paghes de disdignu o de amore,
Sempr'a prou sinzeru adoradore
In festinu o in lagrimas dolente.
Tue faghes amante unu serpente
Cun sos risitos tuos e miradas...
Ite bella chi ses, cantu m'agradas!
Paolicu Mossa