Pensamentosu
antologia

                          1

Pensamentosu unu sero 'e istiu  

mi sezzo a mi godire sa friscura

e s'innida 'e campagna aria pura

mi torrat a su corpus forza e briu;

su murmuttire de s'abba in su riu

chi falat da su monte a sa bassura

                        2

attit in coro meu undas d'amore

e m'ammentat sa bella pizzinnia

cando in sos pojos suos m'infundia

pro fuir'e s'istiu su calore;

cando chi s'agatterat su dolore

mai mancu sognadu mi l'haia.

                         3                         

Su sole a bell'a bellu che tramuntat

e avanzat s'iscuru a passu lentu

e-i s'illaccanadu firmamentu

d'isteddos luminosos si trapuntat,

sa luna intantu da su nudda ispuntat

bestinde tottu in color'e arghentu.

                         %%%%

                          4

Pensamentosu e sempre pius cunfusu

dae sas meravizas ch'ido in tundu

dimando:cale est s'essere profundu

ch'hat custos ingranaggios postu in usu?

Ch'in miliones d'annos e piusu

no han faddidu mai unu sigundu.

                           5

Pensamentosu in custa notte amena

sigo a mi marteddare su cherbeddu

ma risposta no b'hat e ne faeddu

chi mi nerzat sa trama 'e cust'iscena.

Mentres, che mama, sa luna piena

bizat sa passizada 'e ogn'isteddu.

                            6

E deo che chi sia in mesu insoro

ninnadu 'e tantu incantu m'ingaleno  

e de olare a chelu non mi freno

s'iscutta chi su sonniu assaboro.

E daghi  mi nd'ischido,  intro su coro   

sognu cun realtade che cuvreno.

Salvatore Murgia di Macomer

antologia