Avvertenzia
Su Sommu Pontifici Piu X, premurosamenti riformendi sa Famiglia Cristiana segundu is bisongius de is tempus presentis, tra is ateras cosas, su 14 de lampadas 1905, hiat prescrittu unu Compendiu de sa Dottrina Cristiana, uniformi po tottu sa Provincia Romana, cun sa speranza chi fessit adottau ancoras in is ateras Diocisis de s'Italia.
Is Re.mus Arzobispus e Obispus de totu sa Sardigna, sempri fielis e zelantis esecutoris de is ordinis de su Vicariu de Gesù Cristu, hant stabiliu de usai de moi innantis in totu sa Sardigna su Compendiu de sa Dottrina Cristiana, prescrittu de su Papa in sa Provincia Romana: e po facilitai a totus is fielis s'istruzioni catechistica, s'Eccellentissimu e Reverendissimu Monsignor Balestra, degnissimu Arzobispu de Casteddu, in su 23 de Cabudanni 1907, hiat domandau a su Papa su permissu po chi si pozzessit stampai in sardu custu Compendiu. Sa cali domanda est stetia benignamenti esaudia, comenti risultat de sa litera sighenti:
De su Vaticanu, su 25 de Cabudanni 1907
Ill.mu e Rev.mu Monsignori,
Su Santu Padre, benignamenti arricendi sa domanda de s'Eccellenzia Sua Ill.ma e Rev.ma de su 23 de custu mesi, mi raccumandat de ddi fai conosciri chi cuncedit ais Arzobispus e Obispus de sa Sardigna de podiri stampai su Catechismu tradusiu in lingua sarda, a condizioni però chi sa traduzioni si fazzat cunformi a sa segunda edizioni de su propriu Catechismu.
De s'Eccellenzia Sua Ill.ma e Rev.ma
Umil.mu Serbidori G. Bressan
A s'Eccellenzia Sua Ill.ma e Rev.ma
Monsignor Balestra Arzobispu de Casteddu
Catechismu brevi
prima parti
D. Ses tui Cristianu?
R. Si, deu seu Cristianu po grazia de Deus.
D. Ita bolit nai essiri Cristianu?
R. Essiri Cristianu bolit nai professai sa Fidi e sa lei de Gesù Cristu.
D. Comenti ses stetiu fattu Cristianu?
R. Deu seu stetiu fattu Cristianu po mesu de su santu Battisimu.
D. Cali est su signali de su Cristianu?
R. Su signali de su Cristianu est su signali de sa santa Gruxi.
D. Comenti fais tui su signali de sa santa Gruxi?
R. Deu fazzu su signali de sa santa Gruxi ponendimì sa manu deretta in sa fronti e narendi: In nomini de su Babbu; a pustis a su pettus, narendi: e de su Fillu; a su coddu de manca e a su derettu, narendi: de su Spiritu Santu; e in urtimu narendi: Aici siat.
segunda parti
D. Ita cos'est s'orazioni?
R. S'orazioni est un'elevazioni de sa menti e de su coru a Deus po dd'adorai,po ddu ringraziai e po ddi domandai su chi nos'abbisongiat.
D. Est neçessariu pregai?
R. Si, est neçessariu pregai, e pregai cun frequenzia, poita Deus ddu cumandat e ddu domandat su nostru eternu e temporali.
D. De cantus speçias est s'orazioni?
R. S'orazioni est de duas speçias: mentali e vocali.
D. Cal'est s'orazioni mentali?
R. S'orazioni mentali est cudda chi si fait solamenti cun sa menti, e si narat meditazioni.
D. Cal'est s'orazioni vocali?
R. S'orazioni vocali est cudda chi si fait cun is paraulas, accumpagiadas de s'attenzioni desa menti e de sa devozioni de su coru. Custa orazioni si narat puru pregadoria.
D. Ita cosa nos agiudat a fai beni s'orazioni?
R. A fai beni s'orazioni nos'agiudat: 1. su penzai chi seus a sa presenzia de Deus, e teneus abbisongiu de sa misericordia e de s'assistenzia sua; 2. atturai devotus esternamenti, comenti cumbenit a chini recurrit a s'infinita magestadi de Deus.
D. Podeus nosaterus sperai de otteniri is grazias chi domandaus?
R. Nosaterus podeus e depeus sperai de otteniri is grazias chi domandaus, bastat chi non siant contrarias asa saludi de s'anima nostra.
terza parti.
D. Cantu sunt is cumandamentus de sa santa lei de Deus?
R. Is cumandamentus de sa santa lei de Deus sunt dexi: Deu seu su Segnori Deus tuu: 1. no has a teniri ateru Deus si no a mei; 2. non nominai su Nomini de Deus invanu; 3. arregordadì de santificai is festas; 4. onora a babbu e mama; 5 non bocciri; 6. non lussuriai; 7. non furai; 8. non nai falsu testimongiu; 9. non disigiai sa mulleri de su prossimu; 10. non disigiai benis e ricchesas allenas.
D. Chini hat donau custus cumandamentus?
R. Su propriu Deus hat donau custus cumandamentus in sa lei antiga po mesu de Mosè; e Gesù Cristu ddus hat cunfirmaus in sa lei noa.
da e su Catechismu brevi
Cagliari 1909
Stabilimento tipografico del Corriere dell'Isola