Su jogu

antologia

Opineddu Su Attu e Marzane haian apena finidu 'e chenare. Ca non tenian gana ona Marzane si cch'haiat papadu una pudda cotta a buddiu e Su Attu tres chilos de tzarrete frissiu.

"Ies Opineddu, haiat incomintzadu a isterrer Marzane, su tempus nos hat leadu a truba, deo so' ruttu e seo tantos annos tzoppu. Compare Su Attu est tzurpu 'e naschidorzu. Non tenimus amparu perunu. Perņ: poberos si, ma po onestade! Nois non semus comente a jajos si si cch'haian furadu s'oro a jaju tuu, bonanima. Nois semus impresarios de s'intelligentzia. Nois ponimus a frutu solu ideas tzeniales. E nde tenimus una chi andat bene a tie. Cantu est chi t'hat dadu Papafogu? Sessantabattoro marengos de oro? Menzus de cussu non podet esser. Arrea ca m'acontzo su baculu e benzo a t'amustrare su prozettu. Tue pones su capitale e nois ponimus su triballu. Est unu prozettu continentale, roba issientifica, matematica pura. Nois hamus dimustradu chi 64 est uguale a 65. Hamus costruidu una iscachiera, comente risultat de sos disinnos. In ite cunsistit su triballu: bastat a sistemare sos 64 marengos de oro, unu in d'onni cuadrateddu de sa iscachiera cuadrada. Nois in d'unu minutu dd'ismontamus e dda ricumponimus in d'una iscachiera retangulare tale e cuale sos petzos comente como funi. Non t'acatas de nudda, Opineddu? Su cuadradu est divididu in duos triangulos retangulos congruentes, sos catetos de sos cales misuran otto e tres, e in duos trapezios congruentes cun sas bases majores chi misuran chimbe e sas minores tres.

Custas matessi figuras, chena truccu ne ingannu, ddas ricumponimus a fagher su retangulu, chi no hat mancantzia peruna. Ja ddu creo. Si nois contamus bene, in su retangulu ddu hat unu cuadrateddu in prus, e duncas unu marengu 'e oro in prus. Bastat a fagher s'operatzione sessantabattoro ortas in d'una die e hamus arredopiadu su capitale. In d'un annu semus milionarios. Ite seo nande milionarios, miliardarios!

Su prozetu si narat su jogu, e dd'hat istudiadu Compare Su Attu, ca est unu attu siamesu, et est iscrittu totu in sardu, po esser prus craru a ddu cumprender sentza si deper iscrebeddare. Abadiadiddu e poi bie tue ite mi narrer".

Opineddu abarresit a buca aberta. Uguale sas figuras de sa suddivisione, ma unu cuadrateddu in prus; unu marengu de oro in prus. In pagu tempus capitalistas! E poi, cun custas bravas personas!

Ma comente cche oghesit su bussitu de una butzacca po disponner sos marengos in sa iscachiera, Su Attu e Marzane isparisessin che lampos cun s'oro e sas bonas intentziones.

A nois nos est abarradu su prozetu e dd'ispiegamus a discantzu cun sardas discuisitziones: In sa espressione de Su Jogu podimus notare chi su truccu funzionat solu cando sos argumentos funi termines cunsecutivos de sa serie de fibonacci, (rimandamus su lettore interessadu a un'atera pelea literaria chi tenet titolu propriu fibonacci). Sentz'intrare in detallios tecnicos infadosos e non meda sinnificantes como, afirmamus chi prus est mannu s'indighe de su termine de sa serie de fibonacci chi cunsideramus e prus, semplificande s'espressione, cumparit unu termine infinitesimale chi misurat s'area de su cuadrateddu chi cumparit po miraculu. Custu fattu cheret narrer chi po numereddos piticos su cuadrateddu de sa suddivisione fatta de Marzane no est uguale a sa ricumpositzione retangulare. Ma po numeros mannos, meda mannos, tale disugualliantzia isparit e sas cosas torran a postu. Cun bona paghe de Opineddu.

Dae Sos Contos (sos chi torrana e sos chi non torrana).

 

antologia