Manualeddu de sopravvivenzia.
Commente legge custu libru.
Unu, unu libru, ddu legge' commente ddi parede e praghede. Deasi faede su piaghere suu: cuntentu issu cuntentos tottus. Nois zammus una pariga de cussizzos, po nde pigare prus gustu, e po non si arrennegare meda. S'ortografia, sa sintassi, sas variantes de sa limba, no ddas pigheis meda a sa seria. Mancari, torrais a iscriere tottu e nosi cch'ispedisi s'istoria noa. Una cumparazione tecnica poded'esse sa base po cumprender cantu porcheddinu este su sardu nostru. Bos hais ab'accattare ca in sos contos, de unu a s'atteru cambia' cracchi faeddu, cracchi modu e narrere, o finzas sa matessi istruttura de una frase. Antoni Frau es fattu mannu in Sorradile e chistionad'a sa moda sua, Rinaldo Ortu in Ozzana e tened'issu puru sos modos de narrer suos e Gigliola Congiu naschida e pesada manna in Silanus ha chistionau cun sos pitzoccheddos de iscola in Silanesu. Ma sos ischentes puru non funi tottus de Macumere o Marghinesos: nd'hada Pranarzesos, Canaliscos,de Goceanu e de Meilogu. E originarios de sos Campidanos e de sas Barbagias. Tottu Sardos semus. E tando nos hamus leau sa prus manna
libertade de faeddare donzunu commente su babbu e sa mamma dd'hana imparau, o commente hada imparau de su nonnu e de sa nonna, o mancari commente had'imparau in s'istrada intendende sos cumpanzeddos suos. Bos naro sa veridade: nos semus cumprendios a pare in d'unu lampu. Za'prus pelea a cumprender sa matematica cun sos infadosos arresonamentos suos. E tando custu libru est'iscrittu cun su prus mannu arrespettu po sas variantes locales de sa limba de onzuna de sas trinta e passa' persones che ddue hana triballau. Si bos accattais ca es prus marcada sa variante logudoresa chere' narrer chi in su soziu de ischentes chi cun d'unu mastru hana peleau po imbentare unu contu, inchiana sos logudoresos; e si masprestu incappais in sa parlata e Barigau, tando a i cussu contu hana triballau ischentes e mastru de cussa zona. Sos contos lezzieddos tottus in cale si sia' limba issos siana iscrittos. Si seis pessimistas commente a nois cumminzae de s'appresentada: contamus de furas e de ladros. Si seis ottimistas cumminzae de sa serrada: inie osi imparamus commente faere a cambiare sas furas in arregalias e sos ladrones in benefattores, e pois sighie a lezzere commente su cavaru. Pigae gustu a s'indovinzu. Armae'os de lapis e paperi e provae a mente s'arresposta. Si non ch'arrennessisi provae cund'una calculatrice e, a s'urtimu arrematu, cumporaioso unu computer. Solu tando avventuraioso in sos argumentos nostros. Si no aggradeschisi sas soluziones nostras mandadenos sas bostras: unu cunfrontu es'sempere costruttivu. Ma sos contos ddos podis lezzere ind'un'ordine casuale: nessunu de issos pretendede livellos de connoschenzias minimas. Intercambiabiles commente funi ddos podimus assimbizzare a un'imparis chi non si lassada ordinare, su campu cumplessu po esempiu. Cando cch'hais finiu sas istorias bos'hais ab'accattare cantu mancus de duas cosas: ca nd'ischisi prus pagu e' prima e ca no esistidi unu livellu superiore, nč matematicu e nč eticu. A sa fine, de custu libru faiende su chi cherisi. Ma si dd'hais agattau interessante, (attenzione a s'aggettivu) iscridienos, sempere a ischola, in Macumere.
Sos Autores